Prezidentimiz tárepinen Aralboyı aymaqlarında ekologiyalıq turaqlılıqtı támiyinlew, jasıl maydanlardı saqlaw hám jáne de kóbeytiw maqsetinde alıp barılıp atırǵan «Jasıl mákan» ulıwma milliy háreketi óziniń nátiyjesin kórsetip, hár jılı báhár hám gúz máwsiminde nál egiw jumısları jaqsı jolǵa qoyılmaqta.

Abadanlastırıw basqarması Beruniy rayonlıq bólimi tárepinen, ótken 2024-jılǵı «Jasıl mákan» ulıwma milliy háreketi sheńberinde rayon aymaǵındaǵı «Xalıqlar doslıǵı» hám «Kat» kóshelerinde 1375 túp pavloniya hám katalpa terekleri gúz máwsiminde egilip, rejedegi 65 mıń túpti egiw isleri tolıq orınlanǵan. Búgingi kúnde bolsa Abadanlastırıw bólimi xızmetkerleri tárepinen ıssıxana hám pitomniklerde katalpa, pavloniya, shırsha, tut, jiyde, hár túrli gúller, aq hám qara taldıń nálleri menen qálemsheleri tayarlanıp, tárbiyası berilip barılmaqta.
– Elimizdi kóklemzarlastırıw maqsetinde alıp barılıp atırǵan «Jasıl mákan» joybarına úles qosıp atırǵanıma quwanıshlıman. Házir ıssıxanada nállerdi tárbiyalaw ushın onnan aslam hayal-qızlar jumıs alıp barıp atırmız. Quda qálese bul jumıslarımız óz nátiyjesin berip, elimizdiń, perzentlerimizdiń keleshegi ushın hám ekologiyamızdı jaqsılawǵa tiykar boladı, dep úmit etemiz,-deydi abadanlastırıw bólimi xızmetkeri Aynura Dawletbaeva.

Qaraqalpaqstan xabar agentligi