Sońǵı jıllarda Prezidentimizdiń baslaması menen respublikamızda awıl xojalıǵın rawajlandırıw baǵdarında bir qatar ilajlar ámelge asırılıp, sonnan suwdı únemlewshi texnologiyalardı keńnen engiziw, iri xalıqaralıq joybarlar sheńberinde tarawdı rawajlandırıwǵa sırt el investiciyaların tartıwǵa úlken itibar qaratılmaqta.

Respublikamızda xızmet saparında bolıp turǵan Ózbekstan Respublikası Awıl xojalıǵı ministriniń orınbasarı A.Shukurov, Qaraqalpaqstan Respublikası Awıl xojalıǵı ministriniń orınbasarı N.Kayupov hám Jáhán banki xızmetkerleri Qaraqalpaqstan diyqanshılıq ilimiy-izertlew institutına barıp, institutta ámelge asırılıp atırǵan ilimiy jumıslar menen jaqınnan tanıstı.
Bar mashqalalardı saplastırıw hám instituttıń tájiriybe xojalıǵınıń materiallıq-texnikalıq bazasın bekkemlew maqsetinde, Ózbekstan Awıl xojalıǵın modernizaciyalaw joybarı sheńberinde, institutqa ajıratılǵan 600,0 mıń AQSh dollarlıq qarjını ózlestiriw boyınsha tapsırmalar berildi.
Sonday-aq, ushırasıw dawamında institutta miynet etip atırǵan ilimpazlar benen birgelikte pikir alısıp, jaratılıp atırǵan jańa egin sortlarınıń egislik maydanların keńeytiw boyınsha kórsetpeler berildi.

Qaraqalpaqstan xabar agentligi