Ózbekstan Respublikası Prezidentiniń «Ózbekstan – 2030» strategiyasın «Qorshaǵan ortalıqtı qorǵaw hám «jasıl» ekonomika jılı»nda ámelge asırıwǵa baylanıslı mámleketlik baǵdarlama haqqında»ǵı pármanı joybarı islep shıǵılıp, keń jámiyetshiliktiń dodalawı ushın járiyalandı.

Xalqımız – túrli taraw wákilleri, zıyalılar hám jaslar joybar boyınsha óz usınısların bermekte.
Ózbekstan Respublikası Mádeniyat ministrligi janındaǵı Milletleraralıq qatnasıqlar hám sırt elli mámleketler menen doslıq qatnasıqları komitetinde mámleketlik baǵdarlama joybarın dodalaw shólkemlestirildi.
Sońǵı jıllarda Ózbekstanda qabıl etilip atırǵan áhmiyetli hújjetler, ásirese mámleketimizdiń rawajlanıwına tikkeley baylanıslı esaplanǵan strategiyalıq hújjetlerdiń joybarların tayarlawda keń jámiyetshilik, sonday-aq sırt elli ekspertler hám xalıqaralıq jámiyetshiliktiń pikir-usınısların úyreniwge úlken áhmiyetke qaratılıp atırǵanın atap ótiw zárúr.
Bul ilaj bıyılǵı jılǵı mámleketlik baǵdarlama haqqındaǵı párman joybarınıń mazmun-mánisi hám onda belgilenip atırǵan tiykarǵı ilajlar hám wazıypalar haqqında maǵlıwmat beriw, konceptual usınıs, usınıslardı alıw arqalı hújjetti jáne de jetilistiriw maqsetinde ótkerildi.
Mámleketlik baǵdarlama joybarında 5 tiykarǵı baǵdar boyınsha 2025-jıl ushın ámeliy ilajlar, normativlik-huqıqıy hújjetler dizimi hám maqsetli kórsetkishler názerde tutılmaqta.
Komitet baslıǵınıń orınbasarı Azamat Toshev «Ózbekstan-2030» startegiyasınıń 5 baǵdarı kesiminde 2025-jıl ushın mólsherlengen ámeliy ilajlar, normativlik-huqıqıy hújjetler dizimi hám maqsetli kórsetkishler mámleketimizdiń turaqlılıǵın hám xalıq abadanlıǵın kepillewge xızmet etetuǵın áhmiyetli strategiyalıq hújjet ekenin atap ótti.
– Mámleketlik baǵdarlama boyınsha xalıqtıń pikiri soralıp atırǵanı itibarǵa ılayıq, – deydi Komitet baslıǵınıń orınbasarı Azamat Toshev. – Jámiyetshiliktiń dodalawında, bárinen burın áhmiyetli qararlar qabıl etiwde xalıqtıń tilegin esapqa alıw, bul maqsetti ámelge asırıw, mámleketlik hákimiyat uyımlarınıń ashıqlıǵın, olardıń járiyalılıǵın kórsetedi, «Ózbekstan -2030» strategiyasındaǵı keń kólemli maqset hám wazıypalardı bıyılǵı jılı nátiyjeli ámelge asırıp, xalqımızdıń kúndelikli turmısında unamlı ózgerislerge erisiw boyınsha sistemalı háreketlerdi dawam ettiriwge xızmet etedi.
Óz-ara pikirlesiw dawamında 2025-jılǵı mámleketlik baǵdarlamanıń mazmun-mánisi, ondaǵı tiykarǵı ilajlar, wazıypalar haqqında pikirler bildirildi.
Atap ótilgenindey, mámleketlik baǵdarlamada 295 ámeliy ilajlar, 87 normativlik-huqıqıy hújjetler, 269 maqsetli kórsetkishlerdiń belgileniwi názerde tutılmaqta. Hár bir shaxs óziniń kásiplik jumısınan kelip shıǵıp óziniń pikir-usınısların uzbekistan2030.uz onlayn portalı arqalı bildirmekte.
Júzinshi maqset, áyne, jámiyette milletleraralıq tatıwlıq ortalıǵın bekkemlew hám sırt mámleketler menen doslıq qatnasıqların rawajlandırıw sheńberindegi reformalardı óz ishine alǵan bolıp, onda ámelge asırılıwı názerde tutılǵan ilajlar haqqında sóz boldı.
Ilaj sheńberinde milliy mádeniy oraylardıń basshıları Ózbekstanda milletleraralıq qatnasıqlar tarawında alıp barılıp atırǵan siyasat, mámleketlik emes, kommerciyalıq emes shólkemlerge jaratılǵan keń imkaniyatlar ushın óz minnetdarshılıqların bildirdi.
Komitet májilisinde mámleketlik baǵdarlama joybarınıń mazmun-mánisin keń jámiyetshilikke jekteriw, onı jáne de jetilistiriw boyınsha usınıslardı beriw baǵdarında Komitet aldında turǵan wazıypalar boyınsha tiyisli qarar qabıl etildi.

N.Usmonova, ÓzA