Aldın xabar berilgenindey, Qaraqalpaqstandaǵı suw xojalıǵı mákemelerinde járdemshi xojalıqlardı shólkemlestiriw boyınsha jumıslardı úyreniw dawam etip, bunday ilaj Ózbekstan Respublikası Suw xojalıǵı ministrligine qaraslı Jaǵalıqtı qorǵawshı dambalar hám ańǵardı baǵdarlawshı qurılmalar basqarmasınıń aymaqlıq uchastkalarında da alıp barıldı.

Basqarma juwapkerleriniń bergen maǵlıwmatlarına qaraǵanda, jumısshı-xızmetkerlerdi sociallıq jaqtan támiyinlew hám qosımsha xoshametlew maqsetinde 5 aymaqlıq bólimge qaraslı qorǵaw zonalarındaǵı jer maydanlarınan nátiyjeli paydalanıw maqsetinde járdemshi xojalıqlar dúzildi. Sonday-aq, “Jasıl mákan” ulıwma milliy joybarı sheńberinde ámeldegi jer maydanların hám suw xojalıǵı obyektleri átirapların abadanlastırıw hám kóklemzarlastırıw maqsetinde hár qıylı miyweli hám sayamanlı terek nálleri egildi.
– “Jasıl mákan” joybarı boyınsha ótken egiw máwsiminde 14 mıń 807 túp terek nálleri ekologiya platformasına kirgizildi,-deydi Jaǵalıqtı qorǵawshı dambalar hám ańǵardı baǵdarlawshı qurılmalar basqarmasınıń juwapker jumısshısı M.Xudoybergenov. – Aymaqlıq bólimlerde shólkemlestirilgen járdemshi xojalıqlarda 12 qara mal, 35 qoy, 40 eshki, 50 túye tawıq, 342 tawıq, 50 úyrek hám 60 qoyan baǵılmaqta. Álbette, járdemshi xojalıqlarda baǵılıp atırǵan bul sharwa malları hám quslar jumısshı-xızmetkerlerdi qosımsha xoshametlep barıw imkaniyatın jaratpaqta.
Sonıń menen birge, jer maydanlarınan nátiyjeli paydalanıw maqsetinde, 21 gektarlıq maydanǵa gúzgi máwsimde toqsanbastı eginler, atap aytqanda, chesnok, piyaz egilgen bolsa, Ellikqala aymaqlıq bólimi uchastkasında 2 sotıx maydanda limonariya shólkemlestirildi. Beruniy bóliminde jaylasqan járdemshi xojalıqtıń 3 gektarlıq maydanında ǵálle egilip tárbiyalanbaqta.
– Biz, úyreniwler dawamında basqarmanıń Ellikqala bólimindegi jumıslardı kórip, járdemshi xojalıqtı nátiyjeli shólkemlestiriw ushın qızǵın jumıs islenip atırǵanlıǵınıń gúwası boldıq,-deydi Súw xojalıǵı ministrligi baspasóz xızmetiniń baslıǵı Ǵ.Atajanov. – Bul haqqındaǵı videokadrlarımızdı tamashalaǵan basqa suw xojalıǵı mákemeleri de usınday járdemshi xojalıqlardı shólkemlestiriwge úlken itibar qaratıwdı baslaydı, degen isenimdemiz.

Á.Jiyemuratov,
Qaraqalpaqstan xabar agentligi