Búgingi kúnde elimizde insan qádiri hámme nárseden joqarı ekeni derlik hár kúni mayıplıǵı bar insanlarǵa kórsetilip atırǵan ǵamqorlıqlar, hár qıylı qayırqomlıq ilajlarda da ayqın kórinbekte.

Shomanay rayonında da bul máselege ayrıqsha itibar qaratılmaqta. Rayonnıń mektepke shekemgi hám mektep bilimlendiriwi bólimine qaraslı ulıwma orta bilim beriw mekteplerindegi imkaniyatı sheklengen, jeke túrde úy sharayatında oqıp atırǵan oqıwshılardıń sabaqtan tıs waqıtların mazmunlı ótkeriw maqsetinde gezektegi ilaj – sporttıń shashka túri boyınsha jarıs ótkerildi.
Jarıs oqıwshılardıń intellektuallıq múmkinshiligin kórsetiw hám olardıń bos waqıtların mazmunlı shólkemlestiriwge qaratılǵanı menen áhmiyetli.
Jarısta oqıwshılar ózleriniń intellektuallıq qábiletin kórsetip, hár biri jarıs jeńimpazı bolıwǵa háreket etti.
Jeńimpazlar anıqlanıp 1-orındı 7-mekteptiń oqıwshısı D.Raymbergenov, 2-orındı 16-mekteptiń oqıwshısı H.Saparniyazova, al, 3-orındı 7-mekteptiń oqıwshısı A.Muratbaevalar iyeledi.
Jeńimpazlar jarıs shólkemlestiriwshileri tárepinen tayarlanǵan húrmet jarlıqları hám estelik sawǵalar menen sıylıqlandı.

Qaraqalpaqstan xabar agentligi