Miynettiń jemisi….

Birlesken Arab Ámirlikleri paytaxtı Abu-Dabi qalasında «Zayed Sustainability Prize» tańlawında óziniń jańalıqları menen jeńimpaz bolǵan Tashkent qalasındaǵı Prezident mektebiniń oqıwshıları Pahlavon Ǵulomov, Asılbek Ashrapov hám olardıń jetiskenliklerine sebepshi – ustazı Sohibjon Azizov mámleketimiz basshısınıń itibarına sazawar boldı. Olar mámleketimiz jasların turaqlı qollap-quwatlaw, qábiletlerdi múnásip xoshametlep barıw ilajları sheńberinde avtomobil menen sıylıqlandı.
Sıylıqlaw máresiminde oqıwshılar, olardıń ata-anaları, ustazlarına minnetdarshılıq bildirildi.
Esletip ótemiz, tańlawdıń «Global High schools» (Global mektepler) baǵdarında qatnasqan ózbekstanlı eki jas qábilet iyesi jawınnıń suwın qayta islep, paydalanıwǵa jaramlı halǵa keltiriw joybarı menen jeńimpaz boldı.
Olarǵa sıylıqtı BAÁ Prezidenti Shayx Muhammad bin Zoid Ol Nahayan tapsırdı.
Sonday-aq, saltanatlı máresimge Ózbekstan jetekshisi Shavkat Mirziyoev ta qatnastı hám xalıqaralıq ilajda jeńimpaz bolǵan jigitlerimizdi qızǵın qutlıqladı.
Abıraylı tańlaw arqalı wákillerimiz tárepinen búgingi kúnde pútkil dúnya boylap oǵada áhmiyetli sanalǵan bir mashqalaǵa sheshim usınılǵan. Yaǵnıy, suw tam-tarıslıǵı bar aymaqlardaǵı paydalanılmay atırǵan jerlerde jawın suwın toplaw ushın cisterna jaylastırıw jáne jıynalǵan juwdı tazalaytuǵın úskeneler járdeminde qayta islep, ishiw hám kúndelik paydalanıw ushın jaramlı halǵa keltiriw názerde tutılǵan.
Joybardı qarjılandırıw hám ideyanı ámelge asırıw maqsetinde 150 000 dollar investiciya kirgiziledi.
Sıylıqlaw máresimine Ózbekstan Respublikası Bas ministri Abdulla Aripov hám Prezident járdemshisi Saida Mirziyoeva qatnastı.

Musulman Ziyo,
Rustam Nazarmatov,
ÓzA