Nókis garnizonında Qorǵanıw ministrligi bólimlerinde múddetli áskeriy xızmetti ótep atırǵan áskeriy xızmetkerler Ózbekstan Respublikasınıń joqarı bilimlendiriw mákemelerine oqıwǵa kiriwge járdem beretuǵın áskeriy bólim sárkardalıǵınıń jeńilletilgen usınısnamaların alıw ushın test sınaqların tapsırıwdı basladı.

Qorǵanıw, Ishki isler, Ayrıqsha jaǵdaylar ministrlikleri hám Mámleketlik qáwipsizlik xızmeti menen Milliy gvardiyanıń 2019-jıl 30-dekabrdegi “Múddetli áskeriy xızmetti ótep atırǵan áskeriy xızmetkerlerge Ózbekstan Respublikası joqarı bilimlendiriw mákemelerine oqıwǵa kiriw ushın usınısnamalar beriw tártibi boyınsha rejeni tastıyıqlaw haqqında”ǵı qospa qararı menen Ózbekstan Respublikası Qurallı Kúshleri qatarında múddetli áskeriy xızmetti tamamlaǵan, jawıngerlik hám ruwxıy-aǵartıwshılıq tayarlıq boyınsha joqarı nátiyjelerge erisken, zárúr bilim dárejesine iye, úlgili hám eń múnásip áskeriy xızmetkerlerge áskeriy bólim sárkardalıǵınıń jeńilletilgen usınısnaması beriliwi belgilengen.
Usı qospa qararǵa muwapıq, óziniń áskeriy minnetli wazıypaların shın kewilden atqarǵan hám áskeriy bólim komandiriniń jeńilletilgen usınısnamasın alǵan jigitler respublikanıń joqarı áskeriy bilimlendiriw mákemelerindegi tiyisli tálim baǵdarlarına oqıwǵa kiriwde test sınaqlarınıń nátiyjelerine bola toplaǵan ballarınıń 50 procenti muǵdarında qosımsha ball túrindegi jeńillik aladı.
– Sonday-aq, joqarı bilimlendiriw mákemeleri (joqarı áskeriy bilimlendiriw mákemeleri bunnan tısqarı) bakalavriatına oqıwǵa kiriw ushın joqarı bilimlendiriw mákemelerine qabıl parametrlerinen tısqarı ajıratılatuǵın óz aldına qabıllaw kórsetkishleri sheńberinde tańlawda qatnasıw huqıqına iye boladı,-deydi Arqa-Batıs áskeriy okrugi tárbiya hám ideologiyalıq jumıslar basqarması baslıǵınıń orınbasarı, podpolkovnik F.Muhiddinov.
Nókis garnizonındaǵı áskeriy bólimlerdiń birinde ótkerilip atırǵan sınaqlar eń saylandı áskerlerdi anıqlaw hám olarǵa qosımsha jeńillik túrinde usınısnamalardı beriw ushın tańlap alıwdıń juwmaǵı esaplanadı. Sebebi, áskeriy xızmetin ótew dawamında hár bir áskerdiń jawıngerlik hám ruwxıy-aǵartıwshılıq tayarlıqtan alǵan bahaları, xızmette erisken jetiskenlikleri, minez-qulqı hám minnetli wazıypaların hújdan menen atqarıp atırǵanlıǵı qadaǵalap barıladı.
Okrug áskerleri sárkardalıǵı tárepinen usı test sınaqlarında ádillik principlerine tiykarlanǵan halda ashıq-aydınlıqtı támiyinlew maqsetinde tayarlanǵan auditoriyalardıń barlıǵında baqlaw kameraları ornatılǵan bolıp, olar arqalı real waqıt boyınsha kórsetilip atırǵan videokórinislerdiń barlıǵı sistemaǵa jazıp saqlanadı.
Test sınaqlarında 100 soraw bar. Sonnan 40 soraw jawıngerlik tayarlıq, 20 soraw ruwxıy-aǵartıwshılıq tayarlıq, 10 soraw matematika, 10 soraw fizika hám 20 soraw logikalıq sorawlardan ibarat. Durıs juwaplar ushın jawıngerlik tayarlıq boyınsha 1,2 ball, ruwxıy-aǵartıwshılıq tayarlıq ushın 1,1 ball hám qalǵan baǵdarlar boyınsha 1 balldan ball berilip bahalap barıladı. Test sınaqların tapsırıp atırǵan ásker barlıq sorawlarǵa durıs juwap bere alsa, 110 ball toplaw múmkinshiligine iye. Test sınaqların ótkeriw ushın ulıwma 3 saat waqıt ajıratılǵan.
Joqarı bilimlendiriw, ilim hám innovaciyalar ministrligi janındaǵı Bilim hám ilmiy tájiriybelerdi bahalaw agentligi tárepinen alınǵan test sınaqları dawamında qaǵıyda hám nızam buzılıw jaǵdayları anıqlanbadı. Áskeriy xızmetkerlerdiń sanın inabatqa alǵan halda test sınaqları bir neshe kún dawamında alıp barıladı.
Qurallı Kúshler qatarında múddetli áskeriy xızmetti tamamlaǵan puqaralarǵa áskeriy bólimler sárkardalıǵı tárepinen joqarı bilimlendiriw mákemelerine kiriwi ushın berilgen usınısnamalar, olar berilgen sáneden baslap úsh jıl dawamında ámel etedi.

Qaraqalpaqstan xabar agentligi.