AQSh tıń 47-prezidenti Donald Tramp búginnen óz lawazımına kiristi. Aq úyge qaytqan dáslepki kúninen-aq Tramp Baydenniń kóplegen pármanların biykarlawı hám júzge shamalas qararǵa qol qoyıwı kútilmekte. Bul haqqında «ABC News» basılımı málimleme bergen.

Xabarlarǵa qaraǵanda, Tramp AQShta nızamsız jasap atırǵan millionlaǵan migrantlardı jıynaw hám deportaciya etiwge qarar etken.
Sonday-aq, Tramp prezidentlikke kelgen birinshi kúnde-aq, qubla shegaranı tolıq jabıwǵa wáde bergen. Bul háreketlerdi ámelge asırıw ushın mámlekette milliy ayrıqsha jaǵday járiyalanıp, AQSh armiyasınan járdem soraytuǵının málim etken.
Donald Tramptıń siyasat boyınsha orınbasarı Stiven Miller de bul rejelerdi tastıyıqlaǵan.
Málim bolıwınsha, AQShta nızamlı immigraciya statusındaǵı 11 millionǵa shamalas ruqsatnamasız migrantlar jasaydı. Amerika Immigraciya Keńesiniń esap-sanaqlarına qaraǵanda, olardı alıp taslaw jılına milliardlap dollarǵa túsiwi múmkin.
Esletip ótemiz, Donald Tramp 120 jıl ishinde burınǵı wákillik múddeti tawsılǵanınan tórt jıl ótip jáne óz lawazımına kirisken birinshi mámleket basshısı sanaladı.

Qaraqalpaqstan xabar agentligi