Hákimlerdiń máhálle hám shańaraqtı qollap-quwatlaw boyınsha orınbasarları lawazımı saplastırıldı.

Bıyıl 11-yanvardaǵı PP-1-sanlı prezident pármanı menen Shańaraq hám hayal-qızlar komitetiniń boysınıwı Kámbaǵallıqtı qısqartıw hám bántlik ministrliginen Ministrler Kabinetine ótkerilgenligi múnásibeti menen ayırım nızamshılıq hújjetlerine ózgerisler kirgizildi.
Sonıń ishinde, Prezidenttiń 2020-jıl 18-fevraldaǵı PP-5938-sanlı pármanı 8-bánti óz kúshin joyıtqan dep tabılmaqta.
Oǵan bola:
– Qaraqalpaqstan Respublikası Ministrler Keńesi strukturasına – ministr menen kelisilgen halda nızam hújjetlerinde belgilengen tártipte lawazımǵa tayınlanatuǵın hám lawazımnan bosatılatuǵın Ministrler Keńesi Baslıǵı orınbasarı – máhálle hám shańaraqtı qollap-quwatlaw ministri lawazımı;
– wálayatlar hám Tashkent qalalıq hákimlikleri strukturalarına – ministr menen kelisilgen halda nızamshılıq hújjetlerinde belgilengen tártipte lawazımǵa tayınlanatuǵın hám lawazımnan bosatılatuǵın hákim orınbasarları – máhálle hám shańaraqtı qollap-quwatlaw basqarmaları baslıqları lawazımı;
– rayon (qala) hákimlikler strukturalarına – ministr menen kelisilgen halda nızam hújjetlerinde belgilengen tártipte lawazımǵa tayınlanatuǵın hám lawazımnan bosatılatuǵın hákim orınbasarı – máhálle hám shańaraqtı qollap-quwatlaw bólimi baslıǵı lawazımları saplastırıldı.

Qaraqalpaqstan xabar agentligi