Elimizde barlıq tarawlar qatarında transport tarawında da kóplegen jańalanıwlar menen ózgerisler ámelge asırılıp, xalqımızǵa xızmet kórsetiw sapasın jaqsılaw boyınsha bir qatar jumıslar ámelge asırılmaqta.

Bul jumıslardıń dawamı sıpatında Nókis qalasına «Sapsan Trans Nukus» juwapkershiligi sheklengen jámiyeti tárepinen derlik 11 mlrd. sumlıq qarjı esabınan lizing tiykarında 12 dana «YUTONG» markalı zamanagóy avtobuslar Qıtay mámleketinen alıp kelingenin aytıp ótiwimizge boladı.
Jańa transportlardıń paytaxtımızǵa keliwi múnásibeti menen transport ministrliginde saltanatlı ilaj ótkerildi.
Ilajda Qaraqalpaqstan Respublikası Joqarǵı Keńesiniń komitet baslıǵı I.Sdikov, Ministrler Keńesi Baslıǵınıń orınbasarı Sh.Dauletyarov, Transport ministri P.Kaipbekovlar sońǵı jılları Prezidentimizdiń basshılıǵında xalıq xojalıǵınıń barlıq tarawlarında bolǵanı sıyaqlı, transport tarawında júz berip atırǵan jańalanıw hám ózgerislerdi ayrıqsha tilge alıp, respublikamızǵa alıp kelingen jańa avtobuslarlar xalqımızdıń abadan turmısta jasawına xızmet etetuǵınlıǵın atap ótti.
-Atap aytatuǵın bolsaq, húrmetli Prezidentimizdiń jámiyetlik transport xızmetin rawajlandırıw baǵdarındaǵı qararları menen «Brutto-shártnaması, yaǵnıy, «basıp ótilgen jol» hám «sapa» ólshemi tiykarında jolawshı tasıw xızmetin shólkemlestiriw belgilengen,-deydi Qaraqalpaqstan Respublikası transport ministrliginiń málimleme xızmeti baslıǵı Zahiyda Qaljanova.-Usı tiykarda, Nókis qalasında jámi 15 avtobus jónelisleri shólkemlestirilip, bul jónelislerge 188 avtobus alıp keliw rejelestirilgen. Búgingi paydalanıwǵa tapsırılǵan jańa avtobuslar usı baǵdardaǵı jańa jónelislerdiń dáslepkisi esaplanadı.
Ilajda qatnasıwshılar avtobuslarda jolawshılar hám avtotransport basqarıwshısı ushın jaratılǵan qolaylıqlar menen jaqınnan tanısıp, bul boyınsha ózleriniń unamlı pikirlerin bildirdi.
Maǵlıwmat ushın aytatuǵın bolsaq, házirgi waqıtları bul avtobuslardıń jóneliste júretuǵın jolları belgilenip, olardıń hújjetlestiriw isleri alıp barılmaqta.
Ulıwma 60 jolawshı sıyımlılıǵına iye bolǵan bul avtobuslar «Kateks bazarı»nan arqa avtovokzal aralıǵına shekemgi aralıqta qatnawı rejelestirmekte.

Adilbay Orazov,
Qaraqalpaqstan xabar agentligi sholıwshısı