Ózbekstan Respublikası Prezidenti Shavkat Mirziyoevtiń Birlesken Arab Ámirlikleri Prezidenti Shayx Muhammad bin Zoid Ol Nahayannıń mirát etiwine bola usı mámleketke rásmiy saparın Arab qoltıǵı mámleketleriniń basılımları turaqlı sáwlelendirdi. Atap aytqanda, Saudiya Arabstanı Patshalıǵınıń SPA málimleme agentligi, «An-Nahor» basılımı, Egipet Arab Respublikasınıń «Piramida dárwazası», «Egipet búgin» saytları, Birlesken Arab Ámirlikleriniń WAM málimleme agentligi, «Al-Ittihod», «Al-Vatan», «Al-Xalij», «Sharja24» sıyaqlı bir qatar basılımlar eki mámleket basshıları óz-ara doslıq hám kóp táreplemeli birge islesiwdi, sonıń ishinde, siyasat, sawda-ekonomika, investiciya, innovaciya, mádeniy-gumanitarlıq tarawlarda rawajlandırıwǵa baylanıslı áhmiyetli máselelerdi dodalaǵanına itibar qarattı.

Maqalalarda BAÁ hám Ózbekstan jetekshileri óz-ara sheriklikti tereńlestiriwge xızmet etetuǵın máselelerdi dodalaǵanı, sonday-aq, ulıwmalıq máplerge juwap beretuǵın bir qatar temalar boyınsha pikir alısqanı, sóylesiw waqtında eki mámlekettiń turaqlı ekonomikalıq rawajlanıwǵa erisiw jolındaǵı kózqaraslarına únles qayta tiklenetuǵın energiya, qorshaǵan ortalıqtı qorǵaw máseleleri, ekonomikalıq, sawda hám investiciyalıq tarawlarda birge islesiw kólemin keńeytiwdiń perspektivalı imkaniyatları kórip shıǵılǵanı atap ótilgen.
Basılımlar mámleketimiz basshısınıń Abu-Dabide Vice-prezident Shayx Mansur Ol Nahayan, Dubay qalasında Vice-prezident, Bas ministr Shayx Muhammed bin Roshid Ol Maktum menen nátiyjeli sóylesiw ótkergenine de itibar bergen.
Siyasiy baylanıslardı jáne de bekkemlew maqsetinde sırtqı isler ministrlikleri arasındaǵı sóylesiwdi jáne de rawajlandırıw zárúr ekenligi, ekonomikalıq birge islesiwdiń jańa modeli, sonıń ishinde, jasalma intellekt, sanlastırıw, «jasıl» energetika, qala qurılısı hám infrastruktura, turizm, jeke menshik biznes sıyaqlı 6 tiykarǵı baǵdar belgilep alınǵanı, hár bir tiykarǵı taraw boyınsha ayrıqsha jumısshı toparlar shólkemlestiriwge kelisilgeni atap ótilgen. Tárepler 2025-2027-jıllardı Ózbekstan hám BAÁ arasındaǵı ekonomikalıq birge islesiwdiń jańa dáwiri dep járiyalaw usınısın qollap-quwatlaǵanı atap ótilgen.
Usı mánide 2030-jılǵa shekem óz-ara sawda kólemin 10 esege kóbeytiw hám investiciya portfelin 50 milliard dollarǵa jetkeriwge qaratılǵan ilajlardı ámelge asırıw tiykarǵı wazıypa etip belgilengeni dıqqatqa ılayıq.
Ózbekstan jetekshisiniń BAÁǵa rásmiy saparınıń waqıyaların sáwlelendiriwde Arab Qoltıǵı mámleketleri jurnalistleri tárepinen Prezident Shavkat Mirziyoevtiń Abu-Dabi turaqlı rawajlanıw hápteligi sheńberinde de bir qatar áhmiyetli ushırasıwlar ótkergeni, sóylesiwler dawamında elimiz ushın áhmiyetli hújjetlerge qol qoyılǵanı, mádeniy-gumanitarlıq almasıw kólemin arttırıwǵa da ayrıqsha itibar qaratılǵanı atap ótilgen.
Sońǵı jılları tovar almasıw hám óz-ara investiciya kólemi, birgeliktegi kárxanalar sanınıń bir neshe esege artqanı, tikkeley hawa qatnawı kóbeyip, vizasız tártip engizilgeni de názerden shette qalmaǵan.

M.Pirmatova, ÓzA