«BBC Travel» global media portalınıń maǵlıwmatlarına bola, Ózbekstan 2025-jılı sayaxat etiw ushın eń jaqsı 25 baǵdar dizimine kirdi.
Maqalada atap ótiliwinshe, turizm Ózbekstannıń ózine tán dástúrleri hám mádeniy miyrasın saqlaw strategiyasınıń áhmiyetli bólegine aylanıp barmaqta.
Mámleket infrastrukturanı rawajlandırmaqta: jańa miymanxanalar, joqarı tezliktegi temir jol marshrutları, ishki aviareysler hám jańalanǵan mádeniy dıqqatqa ılayıq orınlar sayaxatshılar ushın biytákirar imkaniyatlardı jaratpaqta.
Bulardıń barlıǵı ekonomikalıq ósiwdi xoshametlewge hám Ózbekstan tariyxıy hám mádeniy miyrasınıń sheksiz baylıǵın kórip atırǵan turistlerdi tartıwǵa járdem bermekte.
Atap ótiliwinshe, 90 nan artıq mámleket, sonıń ishinde, Ullı Britaniya, Kanada hám Avstraliya puqaraları Ózbekstanǵa vizasız keliwi múmkin ekenligi sayaxattı sezilerli dárejede ańsatlastıradı hám turistler ushın jańa imkaniyatlar esigin ashadı.
Bunnan tısqarı, qońsı mámleketler menen shegaranı kesip ótiw ádewir ańsatlasqanı atap ótilgen.
«Ótken 2024-jıldıń noyabr ayında Qazaqstan hám Ózbekstandı baylanıstırıwshı «Jipek jolı temir jol sayaxatı» atamasındaǵı birinshi xalıqaralıq temir jol jónelisi iske qosıldı. Bul qolaylı jónelis Ullı Jipek jolı izinen barıp, hár eki mámlekettiń biybaha tariyxıy hám mádeniy dıqqatqa ılayıq orınların arqayın úyreniw imkaniyatın beredi. Bunday sayaxat tek ǵana áyyemgi sawda hám turmıslıq almasıwlar ortalıǵına súńgiw emes, al regionda mádeniy baylanıslardı keńeytiw hám turizmdi rawajlandırıw ushın jańa imkaniyatlar jaratadı», degen juwmaqqa keledi «BBC Travel».
Dizimge AQSh, Kanada, Yaponiya, Italiya, Avstraliya, Marokash, Angliya hám basqa mámleketler de kirgizilgenin atap ótiw kerek.

M.Toshqoraeva, ÓzA