Shımbay rayonı orayında jaylasqan Balalar muzıka hám kѳrkem ѳner mektebinde Ózbekstan Jurnalistler awqamınıń aǵzası, «Shımbay hawazı» gazetası fotoxabarshısı Orazbay Pirlenovtıń 60 jasqa tolıwına baylanıslı yubileyine keshesi bolıp ótti.

Keshege rayon basshıları, nuranıylar, jaslar hám ǵalaba xabar qurallarınıń wákilleri qatnastı.
Ilajda Shımbay rayonı hákimi A.Tajetdinov, Ózbekstan Jurnalistler awqamı Qaraqalpaqstan bóliminiń baslıǵı D. Abibullaev hám basqalar yubilyardı qutlı jası menen qutlıqlap, Orazbay Pirlenovtıń joqarı adamgershilikli pazıyletleri hám óz kásibine degen pidayılıǵın húrmet penen tilge alıp, ózleriniń estelik sawǵaların tapsırdı.
1965-jılı respublikamızǵa belgili fotograf Qıdırbay Pirlenovtıń shańaraǵında dúnyaǵa kelgen Orazbay Pirlenov kishkene gezlerinen baslap-aq, ákesiniń qasında júrip fotojurnalistika hám teleoperatorlıqtıń álwan túrli sırların úyrenip, rayonlıq hám respublikalıq gazetalar, Qaraqalpaqstan televideniesinde óziniń dóretpeleri menen keń jámiyetshilik názerine túse basladı.
-1993-jıldıń oktyabr ayında ákem qaytıs bolǵannan soń, sol waqıttaǵı televidenie basshıları Qaraqalpaqstan teleradiokompaniyasınıń Shımbay rayonı boyınsha arnawlı xabarshısı hám teleoperatorı sıpatında jumısqa aldı hám bul jumısta 2000-jılǵa shekem xızmet ettim,-deydi Orazbay aǵa.-Al, 2000-2006-jılları bolsa, Qaraqalpaqstan teleradiokompaniyasınıń Shımbay rayonı boyınsha teleoperatorı bolıp isledim. Sonıń menen birge, 1998-jıldan berli rayonlıq “Shımbay hawazı” jámiyetlik-siyasiy gazetasınıń fotoxabarshısı bolıp jumıs islep kelmektemen.
Fotojurnalistika óz ústinde izleniw hám miynet etiwdi talap etedi. Fotoxabarshınıń túsirgen hár bir kadrı artında insan ómiri hám olardıń turmısı sáwlelenip, bunnan adamlar ózlerine tiyisli juwmaq shıǵaradı. Óz kásibiniń pidayısı Orazbay Pirlenovtıń islegen miynetleri inabatqa alınıp, ol «Ѳzbekstan Respublikası Ǵárezsizliginiń 15 jıllıǵı» hám «Ѳzbekstan Konstituciyasınıń 30 jıllıǵı» kókirek belgileri menen sıylıqlandı. Ómirlik joldası Gúlistan Ótegenova menen úsh perzentti tárbiyalap, kamalǵa keltirmekte.
Keshede pidayı fotojurnalist Orazbay Pirlenov ilajdı shólkemlestirgeni ushın rayon hákimligi hám Ózbekstan Jurnalistler awqamı Qaraqalpaqstan bólimine óziniń minnetdarshılıǵın bildirdi.
Ilaj rayonlıq mádeniyat bólimi xızmetkerleri tárepinen tayarlanǵan koncert baǵdarlaması menen kewilli dawam etti.

Adilbay Orazov,
Qaraqalpaqstan xabar agentligi sholıwshısı