Sońǵı jılları Nókis qalasında xalıq sanınıń ósiwi menen paytaxtımız aymaǵı keńeyip, turǵınlardıń transport hám jolǵa degen talabı artıp barmaqta. Elimiz Prezidentiniń qollap-quwatlawı menen respublikamızdıń barlıq aymaqlarında bolǵanı sıyaqlı, qalamızdaǵı kósheler de asfaltlanıp, elatlar jıldan-jılǵa abadanlaspaqta.

Bunda Prezidentimizdiń Qaraqalpaqstan Respublikasın sociallıq-ekonomikalıq jaqtan rawajlandırıw, aymaqta isbilermenlikti rawajlandırıw boyınsha shıǵarǵan párman hám qararları menen Ózbekstan Respublikası Oliy Majlisi Senati Kengashiniń «Baslamalı byudjet processlerin ótkeriw hám qarjılandırıw tártibin tastıyıqlaw haqqında»ǵı qararı áhmiyetli xızmet atqarmaqta.
Usı joqarıdaǵı qarar menen ótken jılı paytaxtımızdaǵı Nawqan baǵ elatınıń turǵınları Baslamalı byudjet joybarı tiykarında temir jol ústinen ótetuǵın jańa avtomobil ótkeriw kópirin qurıw ushın 1 mlrd. 146 million sum qarjı jeńip alıp, Teleoray mákan puqaralar jıyınına ótiwshi jańa kópirdiń qurılısı baslanǵan edi.
Qolı gúl qurılısshılardıń islegen pidákerlik miynetleriniń arqasında, bul kópirdiń qurılısı tolıq pitkerilip, ol xalıq iygiligi ushın paydalanıwǵa tapsırıldı.
Kópirdiń tapsırılıw máresimine Nókis qalası hákimi Abatbay Daniyarov, Ózbekstan Máhálleler assosaciyası Qaraqalpaqstan Respublikalıq basqarması baslıǵı Saǵındıq Turmanov hám basqalar qatnasıp, aymaq xalqın jańa avtomobil kópiriniń ashılıwı menen qutlıqladı hám jolǵa tartılǵan dástúriy lentanı saltanatlı túrde kesti.
Nókis qalasındaǵı Nawqan baǵ hám Teleoray mákan puqaralar jıyınların bir-birine baylanıstıratuǵın, puqaralardıń awırın jeńil, uzaǵın jaqın etetuǵın jańa avtomobil ótkeriw kópiriniń paydalanıwǵa tapsırılıwı aymaq turǵınların ayrıqsha quwanıshqa bóledi.
– Teleoray, oraylıq hám qurılıs bazarlarına baratuǵın bolsaq, taksi menen uzaq jollardı aylanıp baratuǵın edik,-deydi Nawqan baǵ elatı turǵını Baǵdagúl Qosbergenova.-Barlıq qáwipsizlik hám sapa standartlarına tolıq juwap beretuǵın bul joldıń paydalıwǵa tapsırılıwı menen bizlerge uqsaǵan mıńlaǵan jolawshılardıń óz mánzillerine qáwipsiz hám tez jetip barıw imkaniyatın payda etti. Bul sharayatlardı jaratqanı ushın elimiz basshılarına hám jıyın aqsaqallarına ózimniń minnetdarshılıǵımdı bildiremen.
Álbette, tapsırılıp atırǵan bul jol aymaq xalqına kóplegen qolaylı sharayatlar jaratıw menen birge, elimiz ekonomikasınıń ósiwine óziniń unamlı tásirin kórsetedi, dep oylaymız.

Adilbay Orazov,
Qaraqalpaqstan xabar agentligi sholıwshısı