Senat baslıǵı, Xalıqaralıq reyting hám indeksler menen islesiw boyınsha Respublikalıq keńes baslıǵı Tanzila Norboevanıń atap ótiwinshe, 2024-jılı mámleketimiz ushın tiykarǵı bolǵan 9 xalıqaralıq reytingte Ózbekstannıń ornı jaqsılandı.

Sonıń ishinde, Еlektron húkimetti rawajlandırıw reytinginde Ózbekstan 2024-jılı burınǵı esap beriw dáwirine qaraǵanda 6 basqıshqa kóterilip, 193 mámleket arasında 63-orındı iyeledi.
Еlektron húkimet tarawında rawajlanıw boyınsha «joqarı» topardan «júdá joqarı» toparǵa kóterilgen 17 mámleket qatarınan orın aldı.
Jáhán bankiniń 2023-jıl ushın járiyalanǵan Statistika jumısı nátiyjeliligi indeksinde respublikamız óz kórsetkishlerin 17 basqıshqa jaqsılap, 217 mámleket arasında 62-orınǵa kóterildi.
Ulıwma alǵanda, keyingi 7 jılda bul indekste Ózbekstan óz poziciyasın 89 basqıshqa jaqsıladı.
Jáhán bankiniń Hayal-qızlar, biznes hám nızam indeksinde mámleketimiz 48 basqıshqa joqarılap, 190 mámleket arasında 91-orındı iyeledi.
Ózbekstan hayal-qızlar huqıqları hám gender teńlik tarawında eń úlken nátiyjelerge erisken áhmiyetli reformalardı ámelge asırǵan 5 mámleketten biri sıpatında atap ótildi.
Xalıqaralıq reyting hám indeksler menen islesiw boyınsha Respublikalıq keńestiń gezektegi májilisinde usınday erisilgen jetiskenlikler atap ótiliwi menen bir qatarda, bul baǵdardaǵı jumıslardıń nátiyjeliligin jáne de artttırıw boyınsha áhmiyetli wazıypalar qoyıldı.
Mámleketimiz basshısı Shavkat Mirziyoevtiń 2024-jıl 19-iyundaǵı «Xalıqaralıq reyting hám indeksler menen islesiw sistemasın jetilistiriw hám usı tarawda parlament qadaǵalawın kúsheytiw boyınsha qosımsha ilajlar haqqında»ǵı pármanınıń orınlanıwın támiyinlewde parlament qadaǵalawın kúsheytiw zárúr ekenligi ayrıqsha atap ótildi.
Párman menen usı tarawda bir qatar jańa mexanizmler ámeliyatqa engizilgeni, atap aytqanda, ministrlik hám uyımlar tiyisli xalıqaralıq reyting hám indekslerge biriktirilgeni, hár jılı Ózbekstan Respublikasınıń tiykarǵı xalıqaralıq reyting hám indekslerdegi ornı jaqsılanıwı haqqındaǵı milliy bayanattı dodalaw tártibi engizilgeni ámelde áhmiyetli orın iyelep atırǵanı atap ótildi.
Unamlı nátiyjeler menen birge ayırım indekslerdegi tómenlewler dodalandı hám tiyisliligi boyınsha juwapker ministrlik hám uyımlar wákilleriniń pikirleri tıńlandı.
Óz gezeginde, mámleket imidjine unamsız tásir etiwshi jaǵdaylardı jedel túrde saplastırıw, kerekli ilajlardı kóriw zárúr ekenligi tapsırıldı.
Májiliste Ózbekstan Respublikasınıń tiykarǵı xalıqaralıq reyting hám indekslerdegi ornı jaqsılanıwı haqqındaǵı ilimiy bayanat joybarı haqqında sóz boldı.
Bul processke ilimiy-izertlew mákemeleri de biriktirilip, 2025-jıl ushın Ózbekstan Respublikasınıń tiykarǵı xalıqaralıq reyting hám indekslerdegi ornın jaqsılawǵa qaratılǵan ámeliy ilajlar baǵdarlamalarınıń joybarları da kórip shıǵıldı.
Májilis sońında Respublikalıq keńestiń tiyisli qararı qabıl etildi.

N.Abduraimova, ÓzA