Paytaxtımızda XXRdıń mámleketimizdegi elshixanası menen birgelikte Ózbekstan-Qıtay biznes forumı bolıp ótti.

Tiyisli ministrlik, uyımlardıń basshıları, 400 ge shamalas biznes wákilleri qatnasqan bul ilajdıń ashılıwında XXRdıń Ayrıqsha hám tolıq huqıqlı elshisi Yuy Czyun bul forum bar baylanıslardı tereńlestiriw, jańa joybarlar islep shıǵıw, ulıwma eki tárepleme sawda-ekonomikalıq birge islesiwdi rawajlandırıw jolında gezektegi qádem bolatuǵının atap ótti.
Atap ótilgenindey, sońǵı jılları Qıtay hám Ózbekstan arasındaǵı birge islesiw kólemi izbe-iz keńeyip barmaqta. Búgingi kúnde Shın mámleketi respublikamızdıń eń iri sawda hám investiciya sherigi esaplanadı.
2024-jıldıń juwmaǵında XXR mámleketimizge kirgizgen investiciya muǵdarı 10 milliard dollardan arttı, tovar almasıw bahası bolsa 13,1 milliard dollardı quradı.
Házirgi waqıtta Ózbekstanda Qıtay kapitalınıń qatnasıwında xızmet kórsetip atırǵan 3357 kárxana aymaqlarda energetika, jeńil sanaat, infrastrukturanı rawajlandırıw, azıq-awqat ónimlerin islep-shıǵarıw, geologiyalıq-izlew sıyaqlı áhmiyetli tarawlarda joybarlar ámelge asırmaqta.
Biznes-forum dawamında Ózbekstanda qolaylı biznes júrgiziw, isbilermenlerdiń huqıqı hám mápin qorǵaw ushın jaratılǵan sharayatlar haqqında maǵlıwmat berildi. Mámleketimizdiń investiciya hám sanaat potencialınıń áhmiyetli táreplerine toqtap ótti. Investiciya joybarların ámelge asırıw hám iske qosılǵan obyektlerden paydalanıw procesinde isbilermenlerdi hár tárepleme qollap-quwatlawǵa tayarlıq bildirildi.
Ánjuman sheńberinde elimizdiń investiciyalıq hám turizm potencialına baǵıshlanǵan prezentaciyalar da kórsetildi. V2V hám V2G túrinde ushırasıwlar shólkemlestirildi. Qatnasıwshılar jańa isbilermenlik baylanısların ornatıw, perspektivalı baslamalardı dodalaw hám óz-ara paydalı shártnamalar dúziw imkaniyatına iye boldı.

ÓzA