Shomanay rayonındaǵı sport mektebinde sporttıń boks túri boyınsha 10-17-jastaǵı jas óspirimler arasında 31-70 kilogramm salmaq kategoriyasında Shomanay rayonlıq sport mektebiniń ashıq birinshiligine start berildi.
Onıń ashılıw máresimine rayon hákimi A.Ametov hám sektor baslıqları qatnastı.

Máresimde rayon hákimi hám basqalar shıǵıp sóylep, jarısqa qatnasıp atırǵan jas sportshılarǵa áwmet tiledi.
Atap ótilgenindey, bunday dárejedegi jarıslardıń ótkeriliwi rayonda sporttı rawajlandırıw, jaslardı sport penen shuǵıllanıwǵa keńnen tartıw, salamat turmıs tárizin qáliplestiriwge qaratılǵanı menen áhmiyetli bolıp esaplanadı.
Bul jarıs jas sportshılar ushın ayrıqsha imkaniyat bolıp tabıladı. Olar ózleriniń sheberligin kórsetip, tájiriybe, sonday-aq, jańa doslar arttırıwı múmkin. Al, Shomanay rayonlıq sport mektebi óziniń ashıq birinshiligin ótkeriw arqalı jas sportshılardı qollap-quwatlaw, olardı sportqa tartıw hám olardıń sport sheberligin arttırıwǵa xızmet etedi.
– Men Shomanay rayonındaǵı 7-sanlı ulıwma bilim beriw mektebinde oqıp atırman. Oqıwdan bos waqıtlarımda rayondaǵı sport mektebine kelip, sport penen shuǵıllanıp atırman. Ótkerilip atırǵan ashıq birinshilikte 45 kilogramm salmaqta jarısqa túsip atırman. Aldıma qoyǵan maqsetim birinshi orınlardı iyelep, Qaraqalpaqstan hám Ózbekstan chempionı bolıw, professional boksshi bolıp jetisiw,-deydi jarıs qatnasıwshılarınıń biri Jánibek Jańabaev.
Jarısta Xorezm wálayatı, Xojeli, Qońırat, Taqıyatas hám Shomanay rayonındaǵı jas boksshiler kúsh sınasadı.
Boks boyınsha ashıq birinshilik ushın gúres 18-19-yanvar kúnleri dawam etedi.

Qaraqalpaqstan xabar agentligi