Mámleketlik baǵdarlama joybarı – dodalawda

Bul házirgi waqıtta dodalawǵa qoyılǵan Ózbekstan Respublikası Prezidentiniń “Ózbekstan – 2030” strategiyasın “Qorshaǵan ortalıqtı qorǵaw hám “jasıl” ekonomika jılı”nda ámelge asırıwǵa baylanıslı mámleketlik baǵdarlama joybarında belgilengen ilajlardan biri.
Búgin bir gektar jerden bunnan bir neshe ese kóp dáramat alıp atırǵan qıytaq jer, fermer hám isbilermenler de bar. Biraq olar júdá az. Maqset áne usınday kategoriyadaǵı diyqan hám baǵmanlardı, isbilermenlerdi kóbeytiw hám xalqımızdıń óz miynetinen mápdarlıǵın arttırıw bolıp tabıladı.
Bizde kóp jaǵdaylarda ápiwayı xalıq hám fermerler de jerge egin egiw yamasa baǵ jaratıwda dástúriy usıllardan paydalanıwǵa yamasa hár jılı birdey ónim jetistiriwge úyrengen. Máselen, kartoshka egetuǵın diyqan hár jılı sol jumıs penen shuǵıllanadı, chesnok ekse, kóbirek payda alıwdı oylamaydı. Yamasa úlken qıytaq jeriniń bir shetinde ıqsham ıssıxana qurıp, jılına million sumlaǵan dáramat islew múmkin ekenin esaplamaydı.
Fermerlerimiz de mámleketlik buyırtpadan tısqarı, artıqsha jerde jańa túrdegi ovosh-palız ónimlerin jetistiriw, jańa ónimdarlı tuqımnan paydalanıw múmkin. Biraq buǵan urınbaydı.
Sonlıqtan mámleketlik baǵdarlama joybarında jerden ónimli paydalanıp, kóbirek dáramat alıw ushın sapalı joqarı hám sırt ellerden alıp kelingen tuqımlardı egiw, intensiv texnologiyalardı qollanıp, eginlerdi tárbiyalaw, sonıń ishinde, suwdı únemleytuǵın texnologiyalardı keńnen engiziwdi bunnan bılay da keńeytiw belgilenbekte.
Sonday-aq, joybarda miywe-ovoshqa qánigelesken 51 rayonda miywe-ovoshlardı muzlatıwdı jolǵa qoyıw boyınsha jańa joybarlardı ámelge asırıw hám jıldıń juwmaǵı menen ulıwma quwatlılıǵı 44 mıń tonna bolǵan joybarlardı turmısqa engiziw wazıypası qoyılmaqta. Bul da biykarǵa emes, sebebi búgin dúnyada azıq-awqat qáwipsizligin, xalıqtı jıl dawamında sapalı miywe-ovosh ónimleri menen támiyinlew. bazarda bahanıń turaqlılıǵına erisiw áhmiyetli máselege aylanıp barmaqta. Qala berse, bul arqalı fermer hám isbilermenlerdiń dáramatların bir neshe esege arttırıw imkaniyatı jaratıladı.
Bul baǵdarda sońǵı jıllarda elimizde alıp barılıp atırǵan jumıslardıń nátiyjesinde qısta da bazarlarımızdan, xalıq dasturxanınan miywe-ovosh úzilgen emes. Hátteki, citrus miywelerge shekem ózimizde jetilistirilmekte.
Ulıwma, mámleketlik baǵdarlama joybarında usınıs etilip atırǵan awıl xojalıǵı boyınsha áhmiyetli maqsetler, ilajlardıń ámelge asırılıwı bazarlarda molshılıq, elimiz dasturxanı mol bolıwı hám bul miynet penen shuǵıllanıp atırǵan fermer hám isbilermenlik subyektleri ekonomikalıq turaqlılıǵına, jańa jumıs orınların jaratıwǵa xızmet etedi.

Shavkat ShARIPOV,
Oliy Majlis Senatınıń aǵzası.
ÓzA