Jo Bayden AQSh Prezidenti sıpatındaǵı sońǵı shıǵıp sóylewinde amerikalılardı baylıq hám hákimiyat oligarxlardıń kishi toparı qolında toplanıwı qáwpinen eskertti. Bul haqqında «Euronews» jazǵan.

Baqlawshılar hám ǵalaba xabar qurallarınıń pikirinshe, ol atın tilge almasa da, milliarder Ilon Maskti názerde tutpaqta.
Xalıq penen xoshlasıw sózinde jetekshi Amerikaǵa kúshli tásirge iye oǵada baylar oligarxiyası qáwip salıp atırǵanına itibar qarattı. Onıń bayanatında 1961-jıl áskeriy-sanaat kompleksi qáwpinen eskertken, burınǵı prezidentlerden biri Duayt Еyzenxauerdiń sońǵı shıǵıp sóylegen sózin eskertkendey.
Baydenniń pikirinshe, ol (Mask-redakciya) sociallıq tarmaqtı basqaradı, bunday dáreklerden «amerikalılarǵa nadurıs maǵlıwmat kóshkisi kelip, hákimiyattı óz mápine paydalanıw ushın sharayat jaratıladı». Sonıń menen birge, «erkin ǵalabalıq málimleme quralları qulap túspekte, sociallıq tarmaq bolsa faktti tekseriwden bas tartpaqta».
17 minutlıq shıǵıwında otstavkaǵa shıqqan jetekshi óz miyrasxorı Donald Tramp yamasa onıń átirapındaǵılardıń atın tilge almadı.
Haqıyqatında da, milliarder Ilon Mask jańa lawazımında, Húkimet nátiyjeliligi uyımınıń basshısı sıpatında Tramp hákimshiligine sezilerli tásir kórsete alıwına kópshilik gúmanlanbay atır.
Soǵan qaramastan, Bayden Amerika demokratiyalıq institutları bekkemligine isenetuǵının da atap ótti. Múrájatınıń sońında xalıq, shańaraǵı hám tárepdarlarına prezident sıpatında xızmet etiwdey «ullı maqtanısh» ushın minnetdarshılıq bildirdi, jaslardı belgilep berilgen principler hám institutlardı qorǵawǵa shaqırdı.

ÓzA