Tórtkúl rayonındaǵı “Chibukli” saylaw okruginen saylanǵan Qaraqalpaqstan Respublikası Joqarǵı Keńesiniń deputatı Zavra Abdullaeva Okboshli awıl puqaralar jıyını turǵınları menen ushırasqanda úylerde gaz basımınıń tómenlep ketkenligi tuwralı múrájat bildirildi.

Bul mashqala boyınsha rayonlıq gaz támiynatı kárxanasınıń baslıǵı B.Madaminov menen sóylesildi hám onı saplastırıw boyınsha tapsırma berildi. Aymaq turǵınların tábiyǵıy gaz benen támiyinlep turǵan D-219 mm gaz trubalarda ońlaw jumısları baslap jiberildi. Kárxana jumısshıları tárepinen ońlaw jumısları sapalı pitkerilip, gaz támiynatı jaqsılandı.
Bunday múrájatler saylawshılar tárepinen jiyi kelip turadı. Aymaq turǵınları isenim bildirip saylaǵan deputat bul juwapkershilikten tiyisli juwmaq shıǵarǵan halda kelip túsken múrájatlerde bildirilgen mashqalalardı waqtında sheshiwge háreket etpekte. Okboshli awıl puqaralar jıyını turǵınlarınan mektepke shekemgi bilimlendiriw shólkemin ashıwda ámeliy járdem sorap múrájat kelip tústi.
Málim bolǵanınday, awıl puqaralar jıyını aymaǵında 3-7 jas aralıǵındaǵı 572 bala bolıp, búgingi kúni 2 mámleketlik emes mektepke shekemgi bilimlendiriw mákemesinde 75 bala, májbúriy biypul bir jıllıq mektepke tayarlaytuǵın 4, qısqa múddetli toparlarǵa 160, jámi 235 bala qamtıp alınǵan. Sonnan mektepke shekemgi bilimlendiriwge qamtıp alınbaǵan bala 337 ni kuraydı. Usılardı esapqa alǵan halda awıl puqaralar jıyını aymaǵınan 150 orınǵa mólsherlengen jańadan mektepke shekemgi bilimlendiriw mákemesin qurıw boyınsha rayonlıq mektepke shekemgi hám mektep bilimlendiriwi bóliminiń baslıǵına deputatlıq sorawnama jiberildi.
Bunnan tısqarı aymaq turǵınların suw menen támiyinlep turǵan Bozjap kanalın tazalaw, 24-sanlı ulıwma bilim beriw mektebi janında suw trubasınıń jarılǵanı tuwralı múrájatler kelip tústi. Bul múrájatler boyınsha tiyisli shómlemlerdiń basshıları menen sóylesildi. Búgingi kúni suw támiynatındaǵı mashqala sheshimin tawıp, Bozjap kanalında qazıw jumısları dawam etpekte.

Qaraqalpaqstan xabar agentligi