Búgingi kúnde barlıq atızlardıń shetlerinde, kanallar, suwǵarıw hám kollektor-drenaj tarmaqlarınıӊ átiraplarındaǵı maydanlarda, qıytaq jerlerde, xojalıqlar hám kóp qabatlı turaq jaylar átirapı hám máhállelerdegi ishki kóshelerde awıl xojalıǵı ónimleri jetistiriliwin shólkemlestiriw hám basqa da dáramat dáregin jaratıw máselelerine ayrıqsha itibar qaratılmaqta.

Suw xojalıǵı sistemasında da járdemshi xojalıqlardı shólkemlestiriw boyınsha belgilep berilgen wazıypalardıń orınlanıwı respublikamızdaǵı barlıq suw xojalıǵı mákemelerinde qadaǵalawǵa alınǵan.

Qaraózek rayonındaǵı “Quwanısh jarma irrigaciya sisteması” basqarmasınıń basqarıw imaratınıń átirapındaǵı bos turǵan jerlerde de qus hám qoyan baǵıw ushın sharayatlar jaratıldı.

– Sonıń menen birge, bul jerde 20 bas qoy-eshki de baǵılmaqta. Házirgi waqıtta 27 tawıq hám 40 qoyan baǵılıp atır. Olardı kóbeytiw boyınsha jumısshı-xızmetkerlerimiz benen wazıypalardı kelisip aldıq,-deydi basqarma  baslıǵı X.Reymov.

Usı jıldıń 16-yanvar kúni “Quwanısh jarma irrigaciya sisteması” basqarmasında járdemshi xojalıqlardı basqarmanıń basqa aymaqlıq uchastkalarında da shólkemlestiriw máseleleri boyınsha kórgizbeli ilaj ótkerilip, juwapkerlerge tapsırmalar berildi.

Qaraqalpaqstan xabar agentligi