Astana qalasında Qazaqstan hám Ózbekstan arasında turistlik poezdlardıń qatnawı haqqında kelisimge qol qoyıldı.

Qazaqstannıń «Inbusiness» málimleme agentligi bergen maǵlıwmatqa bola, «Ózbekstan temir jolları» AJ hám Qazaqstannıń «Passajirskie perevozki» AJ kompaniyaları basshıları arasındaǵı ushırasıwda tárepler eki mámleket arasında jolawshı tasıw tarawında óz-ara birge islesiw baylanısların rawajlandırıw máselelerin dodalaǵan.
Atap ótiliwinshe, eki mámleket arasında turistlik poezdlarınıń qatnawı haqqında kelisimge qol qoyılǵan, sonday-aq, birgeliktegi joybarlardı ámelge asırıw boyınsha jumısshı topar quramı tastıyıqlanǵan. Bul baǵdardaǵı birinshi qádemlerden biri «Jipek jolı» turistlik poezdınıń iske qosılıwı boldı.
«Sonday-aq, basqa baǵdarlarda da usıǵan uqsas turistlik marshrutlardı jolǵa qoyıw imkaniyatın kórip shıǵıwǵa qarar etildi. Atap aytqanda, jańa «Astana-Samarqand» xalıqaralıq jónelisi kórip shıǵılmaqta,-dep jazadı «Inbusiness».
Qalaberdi, sapar dawamında jolawshı tasıwdı basqarıw, háreketleniwshi quramǵa texnikalıq xızmet kórsetiw, málimleme sistemaların engiziw hám biletlerdi onlayn satıwdı shólkemlestiriw boyınsha tájiriybe almasıw máseleleri de dodalanǵan.

Qaraqalpaqstan xabar agentligi