Búgingi kúnde dúnyanıń kóplegen mámleketlerinde, tiykarınan elimizde de «Jasıl energetika» ǵa úlken áhmiyet qaratılmaqta. Húkimetimiz tárepinen biznes iyeleri hám puqaralar ushın quyash panellerinen paydalanıw boyınsha bir qatar jeńillikler usınıs etilmekte.

Beruniyli Nodirbek Atabaev Qıtay mámleketinde grant tiykarında bilim alıp, jas bolıwına qaramastan házirgi waqıtta óziniń isbilermenlik jumısların dawam ettirmekte. Mámleketimizde jasıl ekonomikaǵa ótiw boyınsha alıp barılıp atırǵan reformalar tiykarında ol Qıtay mámleketinen quyash panellerin alıp kelip, xalqımızdıń turaq jaylarına ornatıw jumısları menen shuǵıllanbaqta.
Beruniy rayonındaǵı “Grand Fortuna Logistik” JShJ baslıǵı bolıp usınday iygilikli jumıslardı baslap atırǵan onıń belsendiligi hár bir jasqa úlgi bolsa arzıydı.
-Inglis tilin jaqsı bilgenligim ushın Qıtay mámleketinde oqıp júrip hesh qanday qıynalmadım. Qıtay tilin de tez arada úyrenip aldım. Ol mámlekettiń ekonomikalıq ósiwi meni qızıqtırar edi. Oqıwdı pitkerip kelip, isbilermenlik jumıslarımdı basladım. Prezidentimizdiń baslaması menen jasıl energetikanı rawajlandırıw boyınsha alıp barılıp atırǵan jumıslarǵa mende óz úlesimdi qosıwǵa qarar ettim hám házirgi waqıtta Qıtaydan alıp kelip, quyash panellerin qurıp xalqımızǵa xızmet etip atırmız,-deydi jas isbilermen.

Qaraqalpaqstan xabar agentligi