Qaraqalpaqstan Respublikası Bajıxana basqarması xızmetkerleri hám onda bajıxana institutınıń ámeliyat ótep atırǵan 4-kurs kursantları Nókis qalasındaǵı 25-sanlı ulıwma bilim beriw mektebinde bolıp, Bajıxana institutına oqıwǵa qabıllaw ushın bolıp atırǵan processler tuwralı maǵlıwmat berdi.

Dáslep, oqıwshılarǵa bajıxana tarawı, onıń maqset hám minnetli wazıypaları haqqında túsinikler berildi.
Soń, bajıxana sistemasına maman hám bilimli kadrlardı jetkerip beretuǵın Bajıxana institutı hám onda jaratılǵan sharayatlar, qabıllaw processleri, tańlaw shártleri, talabannıń juwap beriwi shárt bolǵan fizikalıq parametrleri haqqında oqıwshılarǵa tolıq maǵlıwmatlar berildi.
Atap ótilgenindey, bajıxana institutında oqıw múddeti 4 jıl. Bajıxana jumısı (matematika, inglis tili) hám bajıxana jumısın huqıqıy júrgiziw (tariyx, inglis tili) tálim baǵdarlarında oqıwǵa kiriwdi qálewshi talabanlar usı jıldıń 1-aprel sánesine shekem óz hújjetlerin tapsırıwı múmkin. Psixologiyalıq test, fizikalıq tayarlıq hám awızsha sáwbetlesiw shártlerinen tabıslı ótken talabanlar Mámleketlik test orayı tárepinen abiturientlerden alınatuǵın test sınaqlarına jollama aladı hám test nátiyjeleri boyınsha joqarı ball alǵanlar oqıwǵa qabıl etiledi.
Ilaj úsh áwlad wákilleriniń ushırasıwı menen dawam etti. Olar óz-ara pikirlesip, tarawda júz berip atırǵan reformalardı dodalaw múmkinshiligine iye boldı.
Ushırasıw dawamında mektep oqıwshıları ózlerin qızıqtırǵan sorawlarǵa juwap aldı.
Álbette, bunday ushırasıwlar ósip kiyatırǵan jaslardı milliy watansúyiwshilik ruwxında tárbiyalaw, huqıq-qorǵaw uyımlarındaǵı xızmetke qızıqtırıw, sonıń menen birge, Watanımızdıń rawajlanıwı jolında xızmet etiwshi márt qorǵawshılar bolıwına túrtki beredi.

Qaraqalpaqstan xabar agentligi