«Gender teńlik belsendisi» milliy tańlawınıń respublikalıq basqıshı jeńimpazların sıylıqlaw máresimi bolıp ótti.

Senat Baslıǵı Tanzila Norboeva ashıp bergen ilajda «Gender teńlik belsendisi» milliy tańlawı hayal-qızlardıń jámiyettegi rolin arttırıw, gender teńlik hám shańaraq máseleleri boyınsha Respublikalıq komissiyanıń baslaması menen hár jılı dástúriy túrde ótkerilip kiyatırǵanı atap ótildi.
Bul tańlawdı shólkemlestiriwden tiykarǵı maqset, hár bir shólkemde gender teńlikti támiyinlewge qaratılǵan siyasattı qáliplestiriw, tarawda ámelge asırılıp atırǵan aldınǵı tájiriybelerdi anıqlaw hám ǵalaba en jaydırıw hám hayal-qızlardıń huqıqları menen máplerin qorǵawdan ibarat.
Atap ótilgenindey, Prezidenttiń basshılıǵında sońǵı jılları hayal-qızlardıń huqıqları menen máplerin qorǵaw hám mámleketlik basqarıw hám jámiyettiń barlıq tarawlarında jedelligin arttırıw baǵdarında keń kólemli reformalar ámelge asırılmaqta.
Olardıń huqıqları menen erkinliklerin tolıq támiyinlew máseleleri jańa redakciyadaǵı Konstituciyada, «Ózbekstan – 2030» strategiyası hám Gender teńlikke erisiw strategiyası sıyaqlı konceptual hújjetlerde óziniń tolıq kórinisin tapqan.
Bul baǵdarda alıp barılıp atırǵan sistemalı ilajlar xalıqaralıq jámiyetshilik tárepinen de keńnen tán alınbaqta. Atap aytqanda, Jáhán banki indeksinde Ózbekstan gender teńlik tarawında dúnyadaǵı eń tez rawajlanıp atırǵan 5 mámlekettiń qatarında atap ótildi. Ashıq gender maǵlıwmatlar indeksinde eń jaqsı 20 mámleket qatarınan orın aldı.
Gender teńlik hám basqarıw indeksinde bolsa 103-orınnan 51 tekshege kóterilip, 52-orındı iyeledi.
«Gender teńlik belsendisi» milliy tańlawında qatnasıw ushın 934 shólkem hám mákeme tárepinen hújjetler usınıldı. Olar tańlaw komissiyası tárepinen reje talapları tiykarında bahalanıp, 10 nominaciya boyınsha tómendegiler jeńimpaz dep tabıldı.
«Gender teńlikti támiyinlewde eń belsendi respublika dárejesindegi mámleketlik uyım» – Ózbekstan Respublikası Milliy gvardiyası.
«Gender teńlikti támiyinlewde eń belsendi aymaqlıq mámleketlik uyım» – Qaraqalpaqstan Respublikası Ishki isler ministrligi;
«Gender teńlikti támiyinlewde eń belsendi rayonlıq mámleketlik uyım» – «Ammofos-Maxam» akcionerlik jámiyeti;
«Gender teńlikti támiyinlewde eń belsendi aymaqlıq hákimlik» – Xorezm wálayatı hákimligi;
«Gender teńlikti támiyinlewde eń belsendi rayon hákimligi» – Sharof Rashidov rayonı hákimligi;
«Gender teńlikti támiyinlewde eń belsendi MKSh» – Ózbekstan Milliy media birlespesi hám «Zakovat» intellektuallıq klubı» MKSh;
«Gender teńlikti támiyinlewde eń belsendi isbilermenlik subyekti» – «Akbarjon Barakat» juwapkershiligi sheklengen jámiyeti;
«Gender teńlikti úgit-násiyatlawǵa qaratılǵan eń jaqsı TV-baǵdarlama» – «Adolat» milliy huqıqıy málimleme orayı «Yuridikalıq klinika» kórsetiwi;
«Gender teńlikti úgit-násiyatlawǵa qaratılǵan Internettegi eń jaqsı veb-sayt yamasa portal» – «Oyina.uz» ruwxıy-aǵartıwshılıq portalı;
«Gender teńlikti úgit-násiyatlawǵa qaratılǵan eń jaqsı basılım» – «Yangi Sirdaryo» gazetası.
Tańlaw jeńimpazları estelik sawǵaları hám diplomlar menen sıylıqlandı.

N.Abduraimova, ÓzA