Qanlıkól rayonı Arzımbetqum awıl puqaralar jıyınındaǵı “Bes qala-2” fermer xojalıǵınıń atız basında Prezidentimizdiӊ 2024-jıl 30-dekabr kúngi “Awıl xojalıǵı maydanlarındaǵı qosımsha imkaniyatlardan paydalanǵan halda ónim jetistiriwdi kóbeytiwge baylanıslı ilajlar haqqında”ǵı qararı talaplarınıӊ orınlanıwın támiyinlew máselelerine arnalıp ámeliy kórgizbeli seminar shólkemlestirildi.

Oǵan rayonda 2025-jılı atız shetleri, kanallar, suwǵarıw hám kollektor-drenaj tarmaqlarınıӊ átiraplarındaǵı maydanlarda, qıytaq jerlerde, xojalıqlar hám kóp qabatlı turaq jaylar átirapı hám máhállelerdegi ishki kóshelerde awıl xojalıǵı ónimleri jetistiriliwin shólkemlestiriwdi muwapıqlastırıw boyınsha dúzilgen rayon jumısshı toparınıń aǵzaları hám fermerler, diyqan xojalıqları hám puqaralar jıyınlarınıń basshıları, karantin xızmetkerleri qatnastı.
Seminarda Awıl-xojalıǵı bóliminiń baslıǵı U.Shamuratov, Qaraqalpaqstan Respublikası Ósimlikler karantini hám onı qorǵaw agentligi baslıǵınıń birinshi orınbasarı P.Orınbaev hám basqalar shıǵıp sóylep, atızlardıń shetlerinde, kanallar, suwǵarıw hám kollektor-drenaj tarmaqları átiraplarındaǵı maydanlarda, qıytaq jerlerde, xojalıqlar hám kóp qabatlı turaq jaylardıń átirapı hám máhállelerdegi ishki kóshelerde awıl xojalıǵı ónimleri jetistiriliwin shólkemlestiriw boyınsha keӊ túrde túsinikler berildi. Pikir-usınıslar bildirilip, tiyisli wazıypalar belgilendi.
Atap ótilgenindey, kerek bolsa hár bir puqara óz úyi átirapındaǵı jerden ózine kerekli ónim alıwın shólkemlestiriw zárúr.
Sonday-aq, ilajda qarar tiykarında berilgen jeӊillikler boyınsha maǵlıwmatlar berilip, qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi