Awıl xojalıǵı jerlerinen ónimli paydalanıw búgingi kúnniń úlken áhmiyetke iye máselesi. Bunıń bir kórinisi retinde Ellikqala rayonındaǵı Aqshakól APJ aymaǵındaǵı “Aqchakwlchi Reyimbergan” fermer xojalıǵında awıl xojalıǵı máselelerine baǵıshlanǵan kórgizbeli seminar ótkerildi.

Seminarda rayon hákimi V.B. Niyazimbetov, Ózbekstan Respublikası Ósimlikler qarantini hám qorǵaw agentliginiń direktorı I.K.Еrgashev, Qaraqalpaqstan Respublikası Ministrler Keńesi baslıǵınıń orınbasarı Sh.J.Teshaev, Qaraqalpaqstan Respublikası Ósimlikler karantini hám qorǵaw agentliginiń baslıǵı R.T.Sherbaev hám rayondaǵı awıl xojalıǵı tarawınıń shólkemleri hám fermer xojalıǵı basshıları qatnastı.
Kún tártibindegi másele Ózbekstan Respublikası Prezidentiniń 2024-jıl 30-dekabr kúngi «Awıl xojalıǵı maydanlarındaǵı qosımsha imkaniyatlardan paydalanǵan halda ónim jetistiriwdi kóbeytiwge baylanıslı ilajlar haqqında»ǵı PQ-465-sanlı qararınıń mazmun-mánisi hám onıń orınlanıwı barısına arnaldı.
Rayon boyınsha atız shetleri, kanallar, suwǵarıw hám kollektor-drenaj tarmaqlarınıń átiraplarındaǵı maydanlarda, xalıqtıń qıytaq jeri, shańaraqlar hám kóp qabatlı turaq jaylardıń aldı hám máhálleniń ishki kóshelerindegi jer maydanların úyrenip, anıq ólshemleri tastıyıqlanadı.
Seminarda 2025-jılı rayon aymaǵındaǵı atız shetlerindegi maydanlarda, kanallar, suwǵarıw hám kollektor-drenaj tarmaqları átirapındaǵı maydanlarǵa miyweli terekler shiye, qáreli, júzim, badam, chilon jiyde, tut teregin egiw belgilendi.

Qaraqalpaqstan xabar agentligi