Sońǵı jılları mámleketimidiń ekonomikalıq ósiw dinamikası turaqlasıp, bul tendenciya xalqımızdıń turmıs dárejesiniń artıwına óziniń unamlı tásirin kórsetpekte. Álbette, bul eki faktor elimizde elektr energiyasınan paydalanıwdıń jáne de artıwına sebep bolmaqta. Maǵlıwmatlarǵa qaraǵanda, 2030-jılǵa shekem Ózbekstanda elektr energiyasına bolǵan talap, shama menen 6-7 procentke ósiwi boljanbaqta.

Sonlıqtan mámleketimizde energetikanıń dástúriy túrlerinen tısqarı, qayta tikleniwshi alternativ energiya dereklerinen paydalanıwǵa úlken itibar qaratılıp, turǵınlarımızǵa jeńilletilgen kreditler tiykarında quyash panelleri qurıp berilmekte.
Bozataw rayonı Bozataw posyolkalıq puqaralar jıyını aymaǵında jasawshı Júginis Nurmanov ta zaman baǵıtın durıs ańlap, ótken jıldıń may ayında banktiń jeńillikli krediti esabınan úyine quyash panelin ornattı.
Ol bul panel arqalı, tek óz úyiniń elektr energiyaǵa bolǵan zárúrligin qanaatlandırıp qoymastan, quyashlı kúnleri ózlerinen awısqan energiyanı rayonlıq elektr tarmaqları kárxanasına satıp kelmekte.
-Elimizdegi hár bir puqara dáwir talabınan kelip shıǵıp turaq jayına usınday quyash panelin ornatsa, shańaraǵı ushın qosımsha dáramat hám úlken imkaniyat boladı,-deydi ol biz benen bolǵan sáwbetinde.

Adilbay Orazov,
Qaraqalpaqstan xabar agentligi sholıwshısı