14-yanvar – Watan qorǵawshıları kúni
Ájiniyaz atındaǵı Nókis mámleketlik pedagogikalıq institutında Ózbekstan Respublikası Qurallı Kúshleri dúzilgenine 33 jıl tolıwı hám 14-yanvar – Watan qorǵawshıları kúnine baǵıshlanǵan ushırasıw hám bayram keshesi bolıp ótti.
Bayram ilajına Arqa-Batıs áskeriy okruginen mayor I.Safarov, Milliy gvardiya basqarmasınıń áskeriy xızmetkeri, leytenant A.Karimov, rezervtegi mayor J.Nurniyazov, rezervtegi serjant M.Óteniyazov, Arqa-Batıs áskeriy okrugi Nókis garnizonı hám áskeriy bólimlerdiń komandirleri, múddetli áskeriy xızmetti atqarıp atırǵan er-azamatlar, sonıń menen birge, fakultet basshıları, tyutorlar hám student-jaslar qatnastı.
Ilajda institut rektorı Q.Qodirov shıǵıp sóylep, qatnasıwshılardı bayram menen qutlıqlap, mámleketimiz Qurallı Kúshleriniń dúziliwi, sońǵı jıllarda jáne de rawajlandırıw, áskerlerdiń jawıngerlik tayarlıǵın jetilistiriw, materiallıq-texnikalıq bazasın bekkemlew, xalıqaralıq abırayın arttırıw baǵdarında ámelge asırılıp atırǵan jumıslar, tarawdaǵı reformalardıń nátiyjeliligi haqqında maǵlıwmatlar berdi.
Atap ótilgenindey, ótken jıllar dawamında Ózbekstan Respublikasın rawajlandırıw boyınsha Háreketler, sonday-aq, Rawajlanıw strategiyaları hám Qorǵanıw doktorinası tiykarında áhmiyetli jáne tariyxıy qararlar qabıl etildi. Ásirese, elimiz kóleminde áskeriy-adminstrativlik sektorlardıń dúzilgenligi, jergilikli byudjet qarjıları esabınan áskeriy xızmetkerlerdi qollap-quwatlaw, olarǵa múnásip xızmet hám turmıs sharayatların jaratıp beriw boyınsha islenip atırǵan jumıslar óziniń unamlı nátiyjelerin bermekte.
Atap aytqanda, milliy armiyamızdıń aymaqlıq, xalıqaralıq reytinglerdegi, ótkerilip atırǵan hár qıylı jarıslardaǵı kórsetkishleri joqarılamaqta. Búgingi kúnde Qurallı Kúshlerimiz dúnya júzinde hám ǴMDA, sonıń menen birge, Oraylıq Aziya mámleketleri arasında joqarı orınlardı iyelemekte.
Milliy, aymaqlıq hám globallıq qáwipsizlikke qarsı hár qıylı qáwipler júz berip atırǵan búgingi kúnde xalqımızdıń tınısh hám paraxat turmısta ómir súriwi, shegaralarımızdıń pútinligin jáne qol qatılmaslıǵın támiyinlew hár birimizdiń aldımızdaǵı baslı wazıypalardan biri bolıp esaplanadı.
Ilajda usınday úlken maqsetlerden kelip shıǵıp, Prezidentimizdiń «Jańa Ózbekstannıń 2022-2026-jıllarǵa belgilengen Rawajlanıw strategiyası haqqında»ǵı pármanınıń joybarında kórsetip ótilgen jeti baslı baǵdardıń biri elimiz qáwipsizligi hám qorǵanıw potencialın kúsheytiw, ashıq-aydın hám pragmatikalıq, jedel sırtqı siyasat alıp barıw ekenligi, sonday-aq, olardan kelip shıǵıp ámelge asırılıp atırǵan jumıslar haqqında maǵlıwmatlar berildi.
Sonıń menen birge, veteran áskeriy xızmetkerler jaslarǵa ózleriniń ómir jolı, awǵan urısınıń aqıbetlerin atap ótip, búgingidey tınısh hám paraxat turmısımızdıń qádirine jetip, jaratılıp atırǵan imkaniyatlardan utımlı paydalanıp, elimizdiń rawajlanıwına úleslerin qosıw boyınsha bahalı másláhátlerin berdi.
Bayram ilajı sheńberinde institutta jaslar tálim-tárbiyasına múnásip úles qosıp, pidayılıq penen jumıs islep atırǵan awǵan urısı qatnasıwshılarına institut rektorınıń húrmet jarlıqları hám sawǵaları tapsırıldı.
Sonday-aq, bayram múnásibeti menen student-jaslar arasında shólkemlestirilgen tańlawlardıń jeńimpazları xoshametlendi.
Ilaj instituttıń talantlı student-jaslarınıń atqarıwındaǵı koncert baǵdarlaması menen dawam etti.
Qaraqalpaqstan xabar agentligi.