Búgingi kúni Jańa Ózbekstandı qurıw jolında erisip atırǵan barlıq jetiskenlikler hám tabıslarımızda Qurallı Kúshlerimiz jáne olardıń qatarlarında óz wazıypasın shın kewilden atqarıp atırǵan mıńlaǵan áskerlerdiń úlesi bar desek, áyne haqıyqattı aytqan bolamız. Sońǵı jılları «Xalıq hám armiya-bir tán, bir jan» degen iygilikli ideya tiykarında Qurallı Kúshlerimizdiń jawıngerlik potencialın arttırıw, áskeriy qurılıs tarawın túp-tiykarınan modernizaciyalaw boyınsha alıp barıp atırǵan reformalarımız nátiyjesinde milliy armiyamızda iri ózgerisler júz berip, onıń qatarında xızmet etiw túp mánisinde abıray-mártebege aylanıp barmaqta.

14-yanvar-Watan qorǵawshıları kúni hám Ózbekstan Respublikası Qurallı Kúshleri dúzilgeniniń 33 jıllıǵı múnásibeti menen paytaxtımızdıń bir qatar orınlarında bayram saltanatları bolıp ótti.
Atap aytqanda Nókis qalası A.Dosnazarov kóshesinde áskeriy sapqa dizilip, Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń basshılıǵında Qaraqalpaqstan Respublikası Joqarǵı Keńesi menen Ministrler Keńesi, Arqa-batıs áskeriy okrugi, huqıq qorǵaw uyımları, miynet jámáátleri, oqıw orınları xızmetkerleri, urıs hám miynet veteranları, jaslar atınan «Hásiretli ana» esteligine gúl sheńberleri qoyıldı.
Sońınan Berdaq atındaǵı Qaraqalpaq mámleketlik akademiyalıq muzıkalı teatrında Watan qorǵawshıları kúni hám Qurallı Kúshlerimiz dúzilgeniniń 33 jıllıǵı múnásibeti menen bayram saltanatı bolıp ótti.
Ilajda Ózbekstan hám Qaraqalpaqstan Respublikalarınıń mámleketlik gimnleri jańladı.
Májiliste Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, áskeriy taraw xızmetkerleri, veteranlardı hám pútkil xalqımızdı bayram menen qızǵın qutlıqladı.
Atap ótilgenindey, milliy armiyamızdıń shegaralarımızdıń qáwipsizligin, Watanımızdıń tınıshlıǵın támiyinlewdegi xızmeti ayrıqsha. Watan qorǵawshıları bar eken, elimiz tınısh, aspanımız ashıq, xalqımızdıń tınısh hám abadan turmısı támiyinlenedi.
Ilajda Mámleketimiz Prezidenti, Qurallı Kúshler Joqarǵı Bas sárkardası tárepinen tarawǵa qaratılıp atırǵan úlken itibar ayrıqsha tilge alınıp, áskeriy xızmetkerlerdi hám olardıń shańaraq aǵzaların sociallıq qollap-quwatlaw, áskeriy qalashalardı abadanlastırıw, zamanagóy infrastrukturanı qáliplestiriw boyınsha sistemalı jumıslar ámelge asırılıp atırǵanı húrmet penen tilge alındı.
Saltanatlı máresimde milliy armiyamız hám huqıq qorǵaw uyımlarında pidákerlik penen xızmet etip atırǵan bir qatar oficerler, serjantlar hám nuranıylarǵa Qaraqalpaqstan Respublikası Joqarǵı Keńesi Prezidiumınıń arnawlı qararı tiykarında, “Ardaqlı nuranıy”, “Watan pidayısı” hám “Úmit ushqını” kókirek belgileri tapsırıldı.
Saltanatlı ilaj kórkem óner sheberleriniń koncert baǵdarlaması dawam etti.

Qaraqalpaqstan xabar agentligi