Ózbekstan Respublikası Prezidenti Shavkat Mirziyoev Birlesken Arab Ámirlikleri Prezidenti Shayx Muhammed Ol Nahayannıń mirát etiwine bola rásmiy sapar menen Abu-Dabi qalasında bolmaqta.
Búgin, 14-yanvar kúni mámleketimiz basshısı «Abu-Dabi turaqlı rawajlanıw hápteligi» xalıqaralıq sammitiniń ashılıw máresiminde hám turaqlı rawajlanıw tarawında Shayx Zoid atındaǵı sıylıqtı tapsırıw máresiminde qatnastı.
Ilajda Ámirlikler Prezidenti Shayx Muhammed Ol Nahayan, Ázerbayjan Respublikası Prezidenti Ilham Áliev, Qazaqstan Respublikası Prezidenti Qasım-Jomart Toqaev, Malayziya Bas ministri Anvar Ibrohim, Nigeriya Prezidenti Bola Tinubu, Ruanda Prezidenti Pol Kagame, Seyshel atawları Prezidenti Uovel Ramkalavan, Uganda Prezidenti Yov eri Museveni hám basqa da sırt eller hám húkimetlerdiń basshıları da qatnastı.
Joqarı mártebeli miymanlardı BAÁ basshısı kútip alǵannan soń, birgelikte súwretke túsildi.
Abu-Dabi turaqlı rawajlanıw hápteligi – bul 2008-jılı BAÁ húkimeti hám «Masdar» kompaniyası tárepinen turaqlı rawajlanıw tarawındaǵı global mashqalalardı sheshiw ushın shólkemlestirilgen xalıqaralıq platforma bolıp esaplanadı. Forumnıń maqseti dúnyada turaqlı rawajlanıwdı jedellestiriw, ekonomikalıq, sociallıq hám ekologiyalıq rawajlanıwǵa járdemlesiw, azıq-awqat hám suw qáwipsizligin támiyinlew, energiya únemliligin hám karbonsızlandırıwdı ámelge asırıwdan ibarat.
Bul retki sammit kún tártibine «jasıl» ekonomika tarawında turaqlı rawajlanıwdı támiyinlew, innovaciyalar hám jańa texnologiyalardı engiziw, energetika hám azıq-awqat qáwipsizligi boyınsha regionallıq birge islesiwdi bekkemlew máseleleri kirgizilgen.
Forum sheńberinde Ámirliklerdiń tiykarın salıwshısı – marhum Shayx Zoid Ol Nahayan atı menen atalıwshı turaqlı rawajlanıw tarawındaǵı jetiskenlikler ushın sıylıq penen sıylıqlaw máresimi de ótkeriledi. Bul retki sıylıqtıń «Global orta mektepler» nominaciyasında Tashkent qalasındaǵı Prezident mektebi jeńimpaz dep tabıldı.
Sıylıqtı Birlesken Arab Ámirlikleri Prezidenti Shayx Muhammed bin Zoid Ol Nahayan tapsırdı.
Prezidentimiz Shavkat Mirziyoev mektep wákilleri menen ushırasıp, olardı jeńis penen qızǵın qutlıqladı.
ÓzA