Mámleketimiz basshısınıń Birlesken Arab Ámirliklerine rásmiy saparı sheńberinde Awıl xojalıǵı ministrligi hám BAÁniń abıraylı IFFCO Group kompaniyası arasında qol qoyılǵan birge islesiw Memorandumı da jańa perspektivalı joybarlar ushın tiykar jarattı.
Awıl xojalıǵı ministri Ibrohim Abdurahmonovtıń qatnasıwında bolıp ótken bul kelisim eki mámleket arasında awıl xojalıǵı tarawındaǵı birge islesiwdi kúsheytiwge qaratılǵan bolıp, bir neshe tiykarǵı baǵdarlardı óz ishine aladı. Atap aytqanda, jasalma ónimlerge qarsı gúres hám intellektuallıq múlkti qorǵaw, import kólemin arttırıw, texnologiyalardı tartıw hám oqıw baǵdarlamaların islep shıǵıw, qosımsha sanaat joybarların ámelge asırıw máseleleri búgingi kún tártibinen áhmiyetli orın iyeleydi.
Memorandumǵa bola, IFFCO Group tárepinen Ózbekstanǵa strategiyalıq azıq-awqat ónimlerin, sonıń ishinde, ósimlik mayı hám undı jılına 10 mıń tonnaǵa shekem eksport etiw rejelestirilgen. Sonday-aq, IFFCO Group ónimlerin qálbekilestiriwge qarsı isenimli ilajlar kóriledi.
Bul kompaniya tárepinen Ózbekstanda azıq-awqat qáwipsizligi orayı shólkemlestiriledi. Sonday-aq, kelisimlerge bola, keleshekte tomat pastası, ósimlik mayları hám basqa da azıq-awqat ónimlerin islep shıǵarıw boyınsha jańa joybarlar ámelge asırıladı.
Sapar dawamında ministrdiń qatnasıwında xalıqaralıq standartlarǵa sáykes qatnas hám uzaq múddetli birge islesiw ushın tiykar bolatuǵın bir qatar ushırasıwlar bolıp ótti. Onda eki tárep arasındaǵı birge islesiwdi jáne de keńeytiw boyınsha kelisimlerge erisildi.
Muhayyo TOShQORAEVA,
ÓzAnıń xabarshısı