Qaraqalpaqstan Respublikası Joqarǵı Keńesindegi Isbilermenler háreketi – Ózbekstan Liberal-demokratiyalıq partiyası frakciyasınıń gezektegi májilisi bolıp ótti.

Onda ÓzLiDeP frakciyasınıń partiya deputatlıq korpusınıń 2025-jılǵa mólsherlengen Is- rejesi dodalandı.

Májiliste Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev, Qaraqalpaqstan Respublikası Joqarǵı Keńesindegi ÓzLiDeP frakciyasınıń baslıǵı Sh.Otemisov hám frakciya aǵzaları, sonday-aq, partiyanıń Qaraqalpaqstan Respublikası Keńesi xızmetkerleri, belsendileri hám ǵalaba xabar qurallarınıń xızmetkerleri qatnastı.

Ilajda Ózbekstan Respublikası Prezidentiniń 2023-jıl 8-avgusttaǵı “Qaraqalpaqstan Respublikasında isbilermenlerge qolaylı sharayatlar jaratıwǵa baylanıslı qosımsha ilajlar haqqında”ǵı PP-129-sanlı Pármanında belgilengen wazıypalardan kelip shıǵıp, partiya hám onıń deputatları aldında turǵan tiykarǵı wazıypalar dodalandı.

Májiliste kórip shıǵılǵan gezektegi másele – Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev tárepinen islep shıǵılǵan “Barlıq jańa tuwılǵan balalar ushın balalar depozitin ashıw boyınsha joybar”dıń prezentaciyası boldı.

Ózbekstan Respublikası Konstituciyasınıń jańa redakciyasında “Ózbekstan – sociallıq mámleket” dep belgilengen. Sociallıq mámleket statusın bekkemlew, jańa tuwılǵan balalardı tárbiyalawda ata-analardı qollap-quwatlaw hám olardı balalarǵa uzaq múddetli investiciya kirgiziwge jáne de jedel tartıw maqsetinde barlıq jańadan tuwılǵan balalar ushın “balalar depozitleri”n ashıw joybarın engiziw usınıs etilmekte.

-Bul joybar bala erjetkende shaxs sıpatında qáliplesiwin, qábiletin rawajlandırıw ushın erkin finanslıq resurslarǵa iye bolıwın támiyinlewge xızmet etedi,-dep atap ótedi Qaraqalpaqstan Respublikası Joqarǵı Keńesi Baslıǵınıń orınbasarı Rustam Saparbaev.

Sonday-aq, barlıq jańadan tuwılǵan balalar ushın “balalar depozitin” ashıw, bul depozitti ata-analar, qáwenderler yamasa basqa da qáwenderler tárepinen nızam tiykarında basqıshpa-basqısh toltırıw imkaniyatı menen támiyinlew hám 18 jasqa tolǵanda procentleri menen tólemin alıw huqıqın beredi.
Joybar menen xalıqta uzaq múddetli investiciyalıq pikir basqıshpa-basqısh qáliplesip, mámleketten járdem qarjıların talap etiw hám sociallıq járdemge baylanıslılıq sezimi azayadı. Áhmiyetlisi, basqıshpa-basqısh ámelge asırılatuǵın ózgerisler “óli pul” kórinisindegi qorlardıń kólemin qısqartıwǵa xızmet etedi.
Dodalawlar dawamında frakciya aǵzaları partiyanıń maqset hám wazıypalarınan kelip shıǵıp, “Barlıq jańa tuwılǵan balalar ushın balalar depozitin ashıw” joybarın bunnan bılay da jetilistiriw boyınsha bir qatar usınıslar berdi. Atap aytqanda, frakciya aǵzaları A.Bayrieva, K.Baymuratov, M.Ibragimov, M.Jumamuratova, K.Eshbaev, M.Abdirovlar bul joybardıń oǵada áhmiyetli ekenin atap ótip, óz pikir-usınısların bildirdi hám onıń xalıq máplerine xızmet etetuǵının atap ótti.
Qızǵın pikir-usınıslar, soraw-juwaplardan soń joybar frakciya aǵzaları tárepinen maqullandı.

Májilis dawamında respublikamızdı sociallıq-ekonomikalıq rawajlandırıwdıń tiykarǵı baǵdarlarına baylanıslı máselelerdiń orınlanıwı boyınsha deputatlıq qadaǵalaw-baqlaw jumısların ámelge asırıw, atqarıw hákimiyatı uyımları baslıqlarınıń esabatların frakciya májilislerinde tıńlaw boyınsha alda turǵan wazıypalardı belgilep aldı.
Ilaj juwmaǵında kún tártibindegi máseleler boyınsha tiyisli qararlar qabıl etildi.

Qaraqalpaqstan xabar agentligi