Tórtkúl rayonındaǵı Muzıka hám kórkem óner mektebinde Ózbekstan Respublikası Qurallı Kúshleriniń dúzilgenine 33 jıl hám «14-yanvar –Watan qorǵawshıları kúni» múnásibeti menen bayram ilajı bolıp ótti.
Ilajdı rayon hákiminiń orınbasarı U.Allabergenov kiris sóz benen ashtı hám milliy armiyamızdıń kúsh-qúdireti haqqında sóz etip, bársheni bayram menen qutlıqladı. Bunnan soń Qorǵanıw isleri bólimi baslıǵı wazıypasın atqarıwshı S.Mingbaev, Respublika Ruwxıylıq hám aǵartıwshılıq orayı rayonlıq bóliminiń baslıǵı J.Settiev, «Nuraniy» qorınıń rayonlıq bólimi baslıǵı Yu.Xodjaniyazov hám rayondaǵı Ábiw Áliy Ibn Sina atındaǵı jámiyetlik salamatlıq texnikumı studenti S.Reyimbaevlar sózge shıǵıp, elimizde tınıshlıqtı saqlaw, Watandı qorǵaw, xalqımızdıń abadan turmıs keshiriwinde ózleriniń bilim hám kúsh ǵayratın jumsap atırǵan Watan qorǵawshıların bayram menen qutlıqladı.
Bunnan soń Qorǵanıw ministrligi, Ishki isler ministrligi, Milliy gvardiya hám Ayrıqsha jaǵdaylar basqarması rayonlıq bólimleriniń bir qatar xızmetkerleri hám sport jarıslarında tabıslardı qolǵa kirgizgen jaslar rayon hákiminiń «Húrmet jarlıq» ları menen sıylıqlandı.
Bayram ilajı rayonlıq mádeniyat bólimi tárepinen tayarlanǵan koncert baǵdalaması menen dawam etti.
Qaraqalpaqstan xabar agentligi.