Tórtkúl rayonındaǵı qánigelestirilgen mektepte Ózbekstan Respublikası Qurallı kúshleri dúzilgeniniń 33 jıllıǵı hám Watan qorǵawshılar kúni múnásibeti menen jańa Ózbekstannıń rawajlanıw strategiyasiniń jeti baslı baǵdarlarınan kelip shıǵıp, «Úsh áwlad» ushırasıwı bolıp ótti.
Ilajǵa deputatlar, rayonlıq qorǵanıw bólimi xızmetkerleri, nuranıylar, áskerler hám keń jámiyetshilik wákilleri qatnastı.
Ushırasıwda Respublikalıq Ruwxıylıq hám aǵartıwshılıq orayı rayonlıq bólimi baslıǵı, Qaraqalpaqstan Respublikası Joqarǵı Keńesiniń deputatı J.Settiev, rayonlıq qorǵanıw bóliminiń baslıǵı wazıypasın atqarıwshı mayor S. Mingbaev, qatardaǵı ásker W. Еshniyozov hám basqalar shıǵıp sóylep, ilaj qatnasıwshıların bayram menen qızǵın qutlıqladı hám sońǵı jılları Qurallı kúshlerimizdi reformalaw, onıń materiallıq-texnikalıq bazasın bekkemlew hám maman kadrlar menen támiyinlew boyınsha islenip atırǵan jumıslarǵa joqarı baha berdi. Sonıń menen birge, oqıwshı jaslarımızdıń áskeriy oqıw orınlarında oqıp bilim alıwı ushın olarǵa jaratılıp atırǵan qolaylı sharayat hám imkaniyatlar haqqında keń túrde túsinikler berilip, hár bir jastı ana-Watandı súyiw hám qorǵaytuǵın márt perzentler bolıwına tilekleslik bildirildi.
Keshede jaslar tárepinen keshe miymanlarına sorawlar berilip, olarǵa tiyisli juwaplar aldı.
Adilbay Orazov,
Qaraqalpaqstan xabar agentligi sholıwshısı