Aralboyı ekonomikasına investiciyalardı tartıw hám xalıqaralıq birge islesiwdi rawajlandırıw maqsetinde Qaraqalpaqstan Respublikası Ministrler Keńesiniń Baslıǵı F.Еrmanov usı kúnlerde Qıtay Xalıq Respublikasında bolıp turıptı.
Ushırasıwlar dawamında eki tárepleme paydalı birge islesiw baǵdarların dodalaw hám jańa joybarlar boyınsha áhmiyetli kelisimlerdi ámelge asırıw maqset etilgen. Еnergetika hám sanaat, awıl xojalıǵı, texnologiya hám innovaciyalıq tarawlarda investiciya kirgiziw boyınsha kelisimler kórip shıǵılmaqta.
Óz gezeginde qıtaylı isbilermenler mámleketimizdegi investiciyalıq ortalıq hám ekonomikalıq reformalarǵa joqarı baha berdi. Olar ózleri menen birge zamanagóy texnologiyalar, qarjılay resurslar hám xalıqaralıq tájiriybe alıp keliwge tayar ekenligin bildirdi.
***
Májbúriy orınlaw byurosı Nókis qalası bóliminiń xızmetkerleri tárepinen alıp barılǵan orınlaw háreketleriniń nátiyjesinde ulıwma miyrastan puqaraǵa tiyisli bolǵan úles óndirip berildi.
Puqaralıq isleri boyınsha Qaraqalpaqstan Respublikası Nókis rayonlararalıq sudınıń 2024-jıl 13-maydaǵı qararına tiykarlanıp qarızdar T.B. dan óndiriwshi E.T. paydasına ulıwma miyrastan úlesi ushın 68 million 895 mıń 834 sum óndiriw belgilengen.
Bul sudtıń qararı Májbúriy orınlaw byurosı Nóksi qalası bóliminiń is júrgiziwine kelip túsken hám orınlaw háreketleri alıp barıldı. Sonıń ishinde, bıyılǵı jıldıń 9-yanvar kúni puqaraǵa miyrastan tyisli 68 million sumnan aslam pulı qarızdardan óndirip berilip, sud qararınıń orınlanıwı támiyinlendi.
Qaraqalpaqstan xabar agentligi