Ózbekstan Respublikası Qurallı Kúshleri dúzilgeniniń 33 jıllıǵı hám Watan qorǵawshıları kúni múnásibeti menen Qaraqalpaqstan Respublikasınıń paytaxtı Nókis qalası boylap “Jańa Ózbekstan armiyası – mámleket tayanıshı, xalqımız maqtanıshı!” súreni astında Ózbekstan Respublikası Qorǵanıw, Ishki isler hám Ayrıqsha jaǵdaylar ministrlikleri hám Milliy gvardiyanıń jawınger bólimleriniń sap tartıp júriwi shólkemlestirildi.
Nókis garnizonı áskeriy orkestri tárepinen atqarılǵan nama sesleri astında bolıp ótken Watan qorǵawshılarınıń kórgizbeli júriwi 14-yanvar – Watan qorǵawshıları kúnin xalıq bayramı sıpatında kórsetip, áyyyam tımsalın ulıǵlawǵa xızmet etti.
Qalanıń oraylıq kósheleri boylap derlik 5 kilometrlik aralıqta áskeriy namalar, jawıngerlik qosıqlar atqarıldı. Áskerlerdiń basılıp atırǵan nıq qádemlerine, saltanatlı kiyimlerine háwes hám árman menen qaraǵan jaslar, isenimli qalqanımız bar ekenliginen jáne bir márte xabardar boldı. Ashıq aspanımız astında elimizde húkim súrip turǵan tınıshlıqqa shúkirshilik keltirip atırǵan jası úlkenlerdiń kewilinde qáterjamlıq oyandı.
Sap tartıp piyada júriwge Nókis qalasında jaylasqan Ózbekstan hám Qaraqalpaqstan respublikalarınıń 55 metrlik biyiklikte ornatılǵan qos bayraqları ornalasqan maydanda juwmaq jasalıp, ilaj koncert baǵdarlaması menen dawam etti.
Mádeniyat hám kórkem óner wákilleri hám áskeriy orkestr tárepinen atqarılǵan nama hám qosıqlar jıynalǵanlarǵa bayramǵa say keypiyat baǵıshladı. Arqa-Batıs áskeriy okruginiń húrmetli qarawıl vzvodınıń múddetli áskeriy xızmetkerleri tárepinen kórsetilgen sap tartıwları hám qol urısı kórgizbeli shıǵıwları da bayramǵa ózgeshe gózzallıq baǵıshladı.
Á.Jiyemuratov,
Qaraqalpaqstan xabar agentligi