Nókis rayonındaǵı gidrotexnikalıq qurılmalardıń texnikalıq jaǵdayı boyınsha “Quwanısh jarma” irrigaciya sisteması basqarmasına qaraslı “Doslıq-1” suw bólistiriwshi qurılması, “Suwxojalıqqadaǵalawı” inspekciyası Qaraqalpaqstan Respublikası basqarması qánigeleri tárepinen úyreniw jumısları alıp barıldı.
Ilajǵa Irrigaciya sisteması basqarması, Qaraózek rayonı “Suw jetkeriw xızmeti” mámleketlik kárxanası xızmetkerleri qatnastı.
Ilajda, “Suwxojalıqqadaǵalawı” inspekciyası Qaraqalpaqstan Respublikası basqarmasınıń bas qánigesi I.Asamatdinov házirgi qısqı kúnlerde jumıs islep turǵan gidrotexnikalıq qurılmalardıń qáwipsizligin támiyinlew, texnikalıq jaǵdayın úzliksiz qadaǵalap barıw, olarda mashqalalar kelip shıqqanda, olardı tez saplastırıw ilajların kóriw boyınsha maǵlıwmatlar berildi. Sonday-aq, usı máselelerge baylanıslı qabıl etilgen párman hám qararlardıń orınlanıwın támiyinlew boyınsha belgilengen wazıypalar tuwralı túsinikler berildi.
Ilaj qatnasıwshıları Nókis rayonı aymaǵındaǵı “Doslıq-1” kanalındaǵı suw bólistiriletuǵın qurılmanıń ayrıqsha jaǵdaylarda avariyalıq awısıq materiallar menen támiyinlengenin, suw alıw orınlarında suwdan paydalanıw qaǵıydalarına ámel etiliwin, suwdıń esap-sanaǵı júrgiziliwin hám gidrotexnikalıq qurılmalardıń texnikalıq jaǵdayın úyrendi.
Úyreniw juwmaǵında gidrotexnikalıq qurılmalardıń texnikalıq jaǵdayın turaqlı qadaǵalap barıw, olardan nátiyjeli paydalanıw hám saqlaw qaǵıydalarına ámel etiw boyınsha juwapkerlerge tiyisli kórsetpeler berildi. Sonıń menen birge, “Quwanısh jarma” irrigaciya sistemaları basqarması hám Qaraózek rayonı “Suw jetkeriw xızmeti” mámleketlik kárxanası juwapkerlerine ózlerine qaraslı barlıq gidrotexnikalıq qurılmalardıń texnikalıq jaǵdayın jaqsılaw boyınsha ilajlar rejesin islep shıǵıp, turaqlı túrde orınlanıwın monitoring etip barıw wazıypası tapsırıldı.
Qatnasıwshılar ózlerin qızıqtırǵan sorawlarǵa juwap aldı.
Qaraqalpaqstan xabar agentligi.