14-yanvar – Watan qorǵawshıları kúni. Bıyıl Ózbekstan Respublikası Qurallı Kúshleriniń dúzilgenine 33 jıl toladı. Ótken dáwirde Ózbekstan armiyası elimizdiń tınıshlıǵın saqlaw, xalqımızdıń paraxatlıǵın támiyinlewde bekkem súyenishke aylandı.

Ózbekstan Jurnalistler awqamı tárepinen Ózbekstan Jazıwshılar awqamı hám bir qatar shólkemler menen birgelikte «Watan – áziz, mártlik – máńgi!» respublikalıq tańlawınıń jeńimpazların saltanatlı sıylıqlaw máresimi bolıp ótti.
Ózbekstan Respublikası Qurallı Kúshleri dúzilgeniniń 33 jıllıǵı hám Watan qorǵawshıları kúni bayramınıń ilajları sheńberinde ótkerilgen bul máresimde Ózbekstan Jurnalistler awqamınıń baslıǵı w.a. Xolmurod Salimov sózge shıǵıp, mámleketimizde qorǵanıw sistemasında ámelge asırılıp atırǵan reformalarǵa toqtap ótti.
Atap ótilgenindey, tańlawǵa usınıs etilgen shıǵarmalarda «Jańa Ózbekstan armiyası – mámlekettiń súyenishi, xalqımızdıń maqtanıshı!» degen iygilikli ideya jámlengen bolıp, Jańa Ózbekstandı qurıwda tınıshlıq oǵada áhmiyetli ekenligi, «Xalıq hám armiya – bir tán bir jan!» principi turmısımızda turaqlı bolıp atırǵanı, shegaralarımızdıń qol qatılmaslıǵın qorǵaw, janajan Watanımızdıń ǵárezsizligi hám suverenitetin bekkemlew, Qurallı Kúshlerimizdiń jawıngerlik potencialın kúsheytiw, bárqulla saq bolıp jasawǵa shaqırıw sıyaqlı temalar keńnen sáwlelengen.
Bul tańlawda júzden aslam jurnalist, jazıwshı hám shayır qatnastı. Tóreshilerdiń juwmaǵına bola, ǵalaba xabar quralları wákilleriniń jurnalistlik materialları – teleradio, baspa basılımları hám internet jurnalistikası, sonday-aq, jazıwshı hám shayırlardıń kórkem shıǵarmaları boyınsha ulıwma 8 dóretiwshi jeńimpaz dep tabıldı.

Muhtarama Komilova, ÓzA