“Ózbekstan -2030” strategiyasın “Qorshaǵan-ortalıqtı qorǵaw hám “jasıl ekonomika” jılında ámelge asırıw boyınsha Mámleketlik baǵdarlama hám onı tastıyıqlaw haqqında”ǵı Ózbekstan Respublikası Prezidenti pármanı joybarı islep shıǵılıp, keń jámiyetshilikke dodalaw ushın járiyalandı.

Mámleketlik baǵdarlama joybarında 5 tiykarǵı baǵdar boyınsha 2025-jıl ushın ámeliy ilajlar, normativlik-huqıqıy hújjetler dizimi hám maqsetli kórsetkishler názerde tutılmaqta.

Baǵdarlama joybarı Oliy Majlis Nızamshıllıq palatasında qızǵın dodalanbaqta, frakciyalar hám komitetler májilislerinde hár tárepleme kórip shıǵılmaqta. Siyasiy partiyalar frakciyaları hám komitetler aǵzaları usı baǵdarlamalıq hújjettiń mazmun-mánisi hám áhmiyeti haqqında óz múnásibeti hám usınısların bildirmekte.

-Mámleketlik baǵdarlama joybarında mámleketimizdi kompleksli rawajlandırıw boyınsha barlıq taraw hám baǵdarlar boyınsha usı jılda ámelge asırılatuǵın tiykarǵı maqset-wazıypalar belgilep alınǵan,-deydi deputat, ÓzLiDeP frakciyası aǵzası Xushvaqt Hayitov. – Qalaberdi, sanlastırıw, xalıqtı isbilermenlikke keńnen tartıw, sonday-aq, sociallıq qorǵawǵa mútáj qatlamdı qollap-quwatlaw, bunday shaqaraqlardaǵı perzentlerdiń bilim alıwı, málimleme texnologiyaların ózlestiriwi ushın sharayatlar jaratıw, sonıń menen bir qatarda, olarǵa keleshekte mámleketlik grant tiykarında kvotalar ajıratıw máseleleri óz kórinisin tapqanı itibarǵa ılayıq. Bunnan tısqarı, jasıllıqtı keńeytiw, “jasıl ekonomikanı”nı rawajlandırıwǵa qaratılǵan keń kólemli wazıypalar názerde tutılıp atırǵanı ayrıqsha áhmiyetke iye. Joybardaǵı ilajlar mámleketimizdiń rawajlanıwına, turmısımızdı jáne de jaqsılawǵa xızmet etedi.

Haqıyqatında da, 2025-jılǵı mámleketlik baǵdarlama joybarında názerde tutılıp atırǵan barlıq baǵdardaǵı maqset-wazıypalar ertengi kúnimizdi jáne de abat etiwde, elimizdiń rawajlanıwın joqarı basqıshqa kóteriwde áhmiyetli orın tutadı. Hújjet joybarı keń jámiyetshiliktiń dodalawı dawamında jáne de xalıqshıl hám turmıslıq hújjetke aylanatuǵınına gúman joq.

ÓzA