Oliy Majlis Nızamshılıq palatasınıń májilisinde bir topar deputatlar tárepinen nızamshılıq huqıqı baslaması tiykarında islep shıǵılǵan – nızam joybarların Nızamshılıq palatasınıń dodalawına kirgiziw hám kórip shıǵıw tártibin jetilistiriwge qaratılǵan nızam joybarı qızǵın dodalandı.
Atap ótilgenindey, qabıl etilip atırǵan nızamlardıń hár tárepleme tolıq bolıwı xalıqtıń abadanshılıǵın arttırıwǵa, insan huqıqları hám erkinliklerin támiyinlewge xızmet etedi. Sonıń menen birge, nızam dóretiwshiligi jumısınıń sapası jańadan qabıl etilgen nızamlardıń Ózbekstan Respublikası Konstituciyasına, milliy nızamshılıqqa, xalıqaralıq huqıqtıń ulıwma tán alınǵan princip hám normalarına, sonday-aq, Ózbekstan Respublikasınıń xalıqaralıq minnetlemelerine muwapıq ekenligin támiyineleytuǵın tártip hám mexanizmlerdiń nátiyjeliligine hár tárepleme baylanıslı.
Bunnan tısqarı, nızam joybarların islep shıǵıw hám qabıl etiwde nátiyjeli qararlar qabıl etiwdiń eń áhmiyetli shárti jámiyetshilik dodalawlarınıń nátiyjeleri boyınsha kórsetilgen puqaralardıń pikirleri hám poziciyaların úyreniw hám inabatqa alıw bolıp esaplanadı.
Bul nızam joybarı menen Ózbekstan Respublikasınıń ayırım nızam hújjetlerine bir qatar qosımshalar menen ózgerisler kirgizilmekte.
Atap aytqanda, nızam joybarların parlamentke kirgiziwde nızam joybarınıń hám xalıqaralıq shártnama tekstiniń huqıqıy ekspertizalarınıń nátiyjeleri hám nızam joybarınıń korrupciyaǵa qarsı ekspertizası hám jámiyetshilik dodalawdıń nátiyjelerin usınıs etiw, sonday-aq, nızamshılıq baslaması huqıqı subyektine nızam joybarın ekinshi oqıwda qabıl etilgenine shekem onı shaqırıp alıw boyınsha Oliy Majlis Nızamshılıq palatasına usınıs kirgiziw huqıqın beriw, nızamlardaǵı huqıqıy boslıqlardı tolıqtırıw hám normalardı ámelge asırıw boyınsha anıq ilajlardı belgilew názerde tutılmaqta.
Nızam joybarınıń qabıl etiliwi nızamshılıq baslaması huqıqı subyektleriniń nızam dóretiwshiligi tarawındaǵı jumısınıń sapasın hám nızamlardıń sociallıq qatnasıqlardı tártipke salıwdaǵı rolin jánede arttırıwǵa xızmet etedi.
Soraw-juwap hám dodalawlardan soń nızam joybarı deputatlar tárepinen qabıl etildi.
Muhtarama KOMILOVA,
ÓzAnıń xabarshısı