Yaponiya salamatlıq milliy institutınıń ilimpazları shabdal insannıń qartayıw procesin tómenletiwshi hám ómirin uzaytıw ózgesheligine iye ekenligin anıqladı. Izertlew nátiyjeleri Asian Journal of Longevity Research (AJLR) jurnalında járiyalandı.
«Shabdal – antioksidantlardıń haqıyqıy káni. Eriytuǵın hám erimeytuǵın kletchatkalarǵa bay bul miywe organizm ushın kúshli qorǵanıw qalqanın jaratadı», – dedi Tokio medicina universiteti gerontologiya hám dietologiya qánigesi, doktor Kenzo Xashimoto.
Izertlewge bola, shabdal quramındaǵı beta-karotin hám polifenol sıyaqlı antioksidantlar salamat kletkalarǵa zıyan jetkermegen halda rak kletkaların tańlap joq etiw ózgesheligine iye. Ásirese, jaqsı jetistirilgen shabdal miywelerin jegende paydası joqarı boladı.
Model organizmlerde ótkerilgen tájiriybeler tiykarında shabdal ekstraktı ómirdi 23 procentke sozıw múmkin, degen juwmaqqa kelingen. Ilimpazlardıń pikirinshe, shabdaldı turaqlı jew densawlıqtı bekkemlew hám ómirdi sozıwdıń eń arzan hám ápiwayı usılına aylanıwı múmkin.
Qaraqalpaqstan xabar agentligi