6-yanvar kúni Oliy Majlis Nızamshılıq palatasındaǵı ÓzLiDeP frakciyasınıń gezektegi májilisi bolıp ótti. Onda mámleketimizdiń turmısına baylanıslı bolǵan bir qatar nızam joybarları kórip shıǵıldı.

Sonıń ishinde, frakciya májilisinde sud hújjetleri hám basqa uyımlardıń hújjetlerin orınlaw sistemasın jetilistiriwge qaratılǵan nızam joybarı birinshi oqıwda kórip shıǵıldı.
Atap ótilgenindey, bul nızam joybarı menen atqarıw jumısların alıp barıw boyınsha birden-bir elektron bazasınıń júrgiziliwi, sonday-aq, qarızdardıń óndiriw qaratılıwı múmkin bolǵan múlki yamasa dáramatları bolmasa hám onıń múlki yamasa dáramatların izlew boyınsha mámleketlik atqarıwshı tárepinen nızamda jol qoyılatuǵın sheńberde kórilgen barlıq ilajlar nátiyjesiz bolsa, atqarıw jumısın alıp barıw dawamında qarızdar ushın belgilengen sheklewler qarızdarlıq tolıq qaplanǵanınan soń biykar etiliwi tártibi belgilenbekte.
Bunnan tısqarı, Salıq kodeksine de bir qatar ózgerisler kirgizilmekte. Atap aytqanda, shaxsqa atqarıw jumısın júrgiziwshi tártibinde júklengen járiymalar salıqlar yamasa jıyımlarǵa kirmeytuǵını, minnetlemeler reestrine kirgizilgen salıq qarızınıń esabı ayrıqsha júrgiziletuǵını hám bul reestrge kirgizilgen sáneden baslap on jıl dawamında tólenbegen salıq qarızı úmitsiz salıq qarızı esaplanatuǵınına baylanıslı ózgerisler menen qosımshalar kirgizilmekte.
Dodalawlarda deputatlar usı nızam joybarınıń qabıl etiliwi sud hújjetleri hám basqa uyımlardıń hújjetlerin tolıq hám sózsiz orınlawdı támiyinlewge, fizikalıq hám yuridikalıq táreplerdiń húqıqların nátiyjeli qorǵawǵa xızmet etetuǵının atap ótti.

Muhtarama Komilova, ÓzA