Shomanay rayonı hákimliginde májilis ótkerildi.
Májiliske Qaraqalpaqstan Respublikası fermer, diyqan xojalıqları hám qıytaq jer iyeleri keńesiniń orınbasarı A.Ajimov, «Turanbank» akcionerlik kommerciyalıq banki Nókis filialınıń basqarıwshısı S.Utemuratov, Shomanay rayonı hákiminiń birinshi orınbasarı A.Bekbergenov hám rayondaǵı bank, kárxana, shólkem basshıları hám hákim járdemshileri qatnastı.
Maqset – 2024-jıl 16-dekabr kúni Prezident Shavkat Mirziyoevtiń basshılıǵında banklerdiń qatnasında máhállelerde xalıqtıń bántligin támiyinlew hám dáramatlı etiwge qaratılǵan tiykarǵı wazıypalardı dodalaw boyınsha ótkerilgen videoselektor májilisinde berilgen tapsırmalardı ámelge asırıw bolıp esaplanadı.
Májiliste usı tiykarda rayondaǵı xalıqtıń bántligin támiyinlew, kámbaǵallıqtan shıǵarıw hám Qıtaydıń 32 tájiriybesin engiziw máseleleri dodalandı.
Májiliste 2025-jıl ushın belgilengen maqsetlerge erisiw boyınsha anıq rejeler islep shıǵıw boyınsha tapsırmalar berildi.
Xalıqtıń bántligin támiyinlew boyınsha jańa jumıs orınların jaratıw, isbilermenlikti rawajlandırıw, fermerlerdi qollap-quwatlaw, kámbaǵallıqtı azaytıw boyınsha sociallıq baǵdarlamalardı ámelge asırıw sıyaqlı áhmiyetli máseleler dodalandı.
Qıtaydıń 32 tájiriybesin engiziw boyınsha máselelerge de ayrıqsha itibar qaratıldı. Bul tájiriybelerdi úyreniw hám ámeliyatqa engiziw arqalı ekonomikanı rawajlandırıwǵa erisiledi. Óndiristi modernizaciyalaw, awıl xojalıǵın rawajlandırıw hám xalıqtıń turmıs dárejesin arttırıwǵa qaratılǵan.
Májiliste qatnasqan barlıq qánigeler óz pikirlerin bildirip, 2025-jılı belgilengen maqsetlerge erisiw ushın birgelikte háreket etiwge kelisip aldı.
Qaraqalpaqstan xabar agentligi