Ózbekstan elshisi Alisher Twxtaev Pakistannıń Karachi qalasında TCS transport-logistika kompaniyasınıń basshısı Xalid Avan menen ushırasıw ótkerdi. Bul haqqında «Dunyo» málimleme agentligi xabar berdi.

Sóylesiwde eki mámleket sawda baylanıslarınıń izbe-izligin támiyinlew, tovarlardı óz waqtında hám sapalı jetkerip beriw mexanizmleri, mámleketlerimizdiń transport-tranzit potencialınan tolıq paydalanıw máseleleri dodalanǵan.
TCS basshısı Xalid Avan Pakistan hám Ózbekstan arasında aviakargo xızmetin jolǵa qoyıwǵa tayar ekenin bildirgen. Onıń atap ótiwinshe, bul xızmet túri tez aynıytuǵın hám qısqa múddetlerde jetkerip beriliwi zárúr bolǵan ónimlerdi tasıwda keń imkaniyatlar jaratadı.
«Oraylıq hám Qubla Aziya regionallıq baylanıslılıq baslaması Ózbekstan hám Pakistannıń tranzit tasıwlardaǵı imkaniyatların tolı iske qosıw, hawa, avtomobil hám temir jol infrastrukturaları potencialınan aqılǵa uǵras paydalanıw, eki tárepleme sawda kólemlerin maksimal arttırıwǵa xızmet etedi», – deydi Xalid Avan.
Sonday-a, Pakistan hám Ózbekstan arasındaǵı transport/tranzit tasıwlarınıń úzliksizligin támiyinlew maqsetinde kompaniya óz-ara alternativ baǵdarlardı islep shıqqanın hám paydalanıp atırǵanın, bul júzege keliwi múmkin bolǵan ayrıqsha jaǵdaylardan tez shıǵıp ketiw imkaniyatın berip atırǵanı atap ótilgen.
Bunnan tısqarı, kompaniya Evropa hám Amerika mámleketleri menen turizm baǵdarındaǵı birge islesiw tájiriybesi tiykarında Ózbekstan menen de baylanıslardı jolǵa qoyıw, TCS bas ofisi janında «Uzbekistan visa facilitation centre» vizaǵa járdemlesiw orayın shólkemlestiriw rejelestirilip atırǵanın málim etti, delinedi xabarda.

Qaraqalpaqstan xabar agentligi