Sońǵı kúnleri sociallıq tarmaqlar hám ǴXQda dúnyanıń bir qatar mámleketlerinde metapnevmovirus infekciyasınıń tarqalıwı hám onıń «COVID-19»dan qáwiplirek ekeni haqqında xabarlar tarqalmaqta. Sanitariya-epidemiyalogiyalıq tınıshlıq hám jámiyet salamatlıǵı komitetiniń basqarma baslıǵı Rustam Ikramov bul jaǵday boyınsha óz juwabın málim etti.
Qánigelerdiń atap ótiwinshe, metapnevmovirus aldınnan belgili bolǵan infekciya bolıp, ol 2001-jılı anıqlanǵan. Metapnevmovirus tiykarınan hawa-tamshı jolı yaki pataslanǵan betler arqalı juǵadı. Hár jılı bul virus penen keselleniw jaǵdayları dúnyanıń barlıq regionlarında atap ótiledi. Qońsı Qazaqstanda da bul virus bar bolıp, onıń máwsimlik ósiwi gúz-qıs aylarında belgilengen.
Bildiriliwinshe, metapnevmovirus tiykarınan murın aǵıwı, jótel hám temperatura sıyaqlı simptomlar menen kózge taslanadı. Ayırım jaǵdaylarda bronxiolit yaki pnevmoniyanı keltirip shıǵarıwı múmkin. Soǵan qaramastan, ayırım jaǵdaylarda nawqaslar simptomlarsız sawalıp ketedi hám kesellikti emlew ádette úy sharayatında ámelge asırıladı.
Ózbekstanda da máwsimlik ótkir respirator infekciyalar kóteriliwi baqlanbaqta. Laboratoriya tekseriwlerine bola, 39,9 procentinde gripp virusı, 32,2 procentinde rinovirus, 30,6 procentinde respirator-sincitial virus hám 1,2 procentinde metapnevmovirus anıqlanǵan. Sonıń ushın, xalıqtan kesellik belgileri bolǵan puqaralar menen qarım-qatnastı sheklew hám profilaktika ilajlarına ámel etiw soralmaqta.
Densawlıqtı saqlaw ministrligi xalıqtı artıqsha qáweterge túspewge hám óz salamatlıǵına saq bolıwǵa shaqıradı. «Metapnevmovirus jańa qáter emes, al máwsimlik infekciya ekenligin umıtpaw kerek», delinedi xabarda.
Qaraqalpaqstan xabar agentligi