Ministrler Kabinetiniń 18-dekabrdegi qararı menen mektepke shekemgi bilimlendiriw sistemasın sanlastırıw hám mektepke shekemgi bilimlendiriw shólkemleriniń jumısın jáne de jetilistiriwdiń qosımsha ilajları belgilendi dep xabar beredi xs.uz.
30-sentyabrdegi prezident pármanına muwapıq, mektepke shekemgi bilimlendiriw shólkemi direktorınıń orınbasarına bilimlendiriwdiń sapasın támiyinlew, pedagog xızmetkerlerdiń úzliksiz kásiplik rawajlanıwın támiyinlew procesine innovaciyalar, aldınǵı pedagogikalıq hám sanlı texnologiyalardı keńnen engiziw wazıypaları júklengen edi.
Mámleketlik ShBShlarda xızmetkerlerdiń miynet haqısın, azıq-awqat qárejetleri, ata-analarǵa aliment boyınsha tólemler hám basqa tólemlerdi biometriyalıq identifikaciya texnologiyasınan paydalanǵan halda avtomat esaplaw engiziledi.
Bos jumıs orınların esapqa alıw, balalardı gezekke qoyıw hám ShBShǵa jaylastırıw ushın jollamalardı qáliplestiriw Mektepke shekemgi hám mektep bilimlendiriwi ministrliginiń «Balalar baqshası» mektepke shekemgi bilimlendiriwdi basqarıw málimleme sistemasında ámelge asırıladı.
2025-jıl 1-fevraldan Tashkent qalasında sınaq túrinde, 2025-jıl 1-iyulden bolsa barlıq mámleketlik ShBShlarda «Balalar baqshası» málimleme sisteması arqalı xızmetkerler hám tárbiyalanıwshılardıń elektron qatnası, jumıs waqtı, tárbiyalanıwshılardıń azıq-awqat qárejetlerin esapqa alıw engiziledi.
«Balalar baqshası» málimleme sistemasına xızmet kórsetiw, onı qollap-quwatlaw hám jetilistiriwdi «UZINFOCOM» JShJ sistema operatorı ámelge asıradı, onda kórsetilgen xızmetler ushın ata-analar tóleminiń 2 procenti baǵdarlanadı.
Еkonomika hám qarjı ministrligi 2025-jıldan baslap xızmetkerler hám balalardıń qatnasıwın shaxstı biometriyalıq identifikaciyalaw texnologiyası arqalı qadaǵalawǵa alıwdı jolǵa qoyıw ushın balalar baqshaların planshetler hám basqa úskeneler menen támiyinlew ushın mámleketlik byudjetten keminde 50 milliard sum ajıratadı.
2025-jıl 1-iyulden fiskal belgili kassa cheki berilmesten ata-analardıń tólemlerin qabıllaw qadaǵan etiledi. Ata-analar tólemleriniń túsimi haqqındaǵı maǵlıwmatlar salıq uyımlarınıń málimleme sistemasına avtomat túrde beriledi hám nızam hújjetlerine muwapıq dáramat salıǵınan azat etiwdi qollanıw ushın tiykar bolıp xızmet etedi.
Qaraqalpaqstan xabar agentligi