Sońǵı jıllarda elimizde ámelge asırılıp atırǵan keń kólemli reformalar, sonıń ishinde, xalıqtıń salamatlıǵın bekkemlew, medicina mákemelerin qáwipsiz hám sapalı dári-dármaqlar, medicinalıq buyımlar menen támiyinlew, tarawǵa sanlastırıwdı engiziw boyınsha alıp barılıp atırǵan ilajlar óziniń unamlı nátiyjesin bermekte.

Búgingi kúnde respublikamızda 17 kóp tarmaqlı oraylıq poliklinika,
81 shańaraqlıq poliklinika, 81 shańaraqlıq shıpakerlik punkti,
92 máhálle medicinalıq punkti xalıqqa xızmet kórsetip kelmekte.
Biz Qaraqalpaqstan Respublikası Densawlıqtı saqlaw ministri Murat Qurbanov penen sáwbetlesip, tarawda ámelge asırılıp atırǵan jumıslar boyınsha qızıqtırǵan sorawlarımızǵa juwap aldıq.
– Murat Ismailovich, tarawda ámelge asırılıp atırǵan reformalar nátiyjesinde respublikamızdaǵı medicina mákemeleriniń bir qatar jetiskenliklerin kórip gúwası bolıp atırmız. Atap aytqanda, 2024-jıl dawamında «Bir qádem» súreni tiykarında medicinalıq xızmetlerdi xalıqqa jaqınlastırıw maqsetinde 13 shańaraqlıq shıpakerlik punktleri shólkemlestirildi. Alıs awıllardaǵı bunday ilajlar qanday nátiyje bermekte?
– Ózlerińizge belgili, Prezidentimiz tárepinen xalıqtıń salamatlıǵın saqlawǵa qaratılıp atırǵan ayrıqsha itibar nátiyjesinde densawlıqtı saqlaw sistemasında keń kólemli reformalar ámelge asırılmaqta.
Ásirese, bul boyınsha Prezidentimiz tárepinen qabıl etilip atırǵan qarar hám pármanlardıń áhmiyetin xalıqqa jetkeriw, anıq belgilengen baǵdarlama tiykarında onıń orınlanıwın támiyinlew – aldımızǵa qoyılǵan maqsetlerge erisiwde áhmiyetli faktor bolmaqta.
Jańa mexanizmler tiykarında orınlarda 962 medicina brigadaları shólkemlestirildi. Shańaraqlıq shıpakerdiń 40 procent júklemesi orta medicina miyirbiykeleri tárepinen orınlanıwı belgilendi. Keselliklerdiń aldın alıw boyınsha profilaktikalıq hám skrining tekseriwler ótkerildi hám universal-progressiv patronaj modeli engizildi.
Kóp tarmaqlı oraylıq poliklinika, shańaraqlıq poliklinika, shańaraqlıq shıpakerlik punktlerinde 1217 kúndizgi stacionar orınları shólkemlestirilgen bolıp, jumıs waqtı saat 20:00 ge shekem belgilendi hám olarda islewshi medicina qánigeleri ushın ústeme haqı tólenip kelinbekte.
Nátiyjede jılına 33 mıńnan aslam nawqasqa baslanǵısh emlew-profilaktikalıq járdem kúndizgi stacionarda úyinen ajıralmaǵan halda emleniw imkaniyatı jaratıldı.
Bul bir jaǵınan xalıqqa medicinalıq járdemniń sapasın arttırıwǵa, ekinshi jaǵınan, olardıń alıs rayon oraylarına barmay-aq, óziniń yamasa jaqın jerdegi awılda ashılǵan awıllıq yaki shańaraqlıq shıpakerlik punktlerde kórinip, dáslepki másláhátlerdi alıwına múmkinshilik jarattı.
Búgingi kúnde respublikalıq qánigelestirilgen oraylardıń aymaqlıq filiallarında 200 túrdegi jańa texnologiyalar engizilip, jılına 6 mıńnan aslam nawqastıń Tashkentke hám sırt ellerge barmay-aq jasaw ornında joqarı texnologiyalıq járdem alıw imkaniyatı jaratıldı.
Sonday-aq, Tórtkúl, Qońırat hám Shımbay rayonlarında birgeliktegi zıyanlanıwlar hám ótkir qan tamır kesellikleri orayları shólkemlestirildi.
Búgingi kúnde jılına 7600 nawqasqa Nókis qalasına kelemen degenshe óz waqtında qıstawlı hám joqarı dárejeli medicinalıq járdem kórsetiliwi támiyinlenbekte.
– Medicina mákemelerinde xalıqqa medicinalıq xızmettiń sapasın arttırıw boyınsha qanday ilajlar ámelge asırılmaqta?
– Búgingi kúnde mámleketimizde xalıqqa medicinalıq xızmet kórsetiwdiń sapasın hám qamtıwın keńeytiwge qaratılǵan kompleksli ilajlar ámelge asırılmaqta.
Bunda densawlıqtı saqlaw mákemelerinde kórsetiletuǵın medicinalıq járdemniń kepillengen kólemleri, medicina mákemelerinde medicinalıq járdemniń kepillengen kólemlerine kirgizilgen diagnozlar, dári-dármaqlar hám medicinalıq buyımlardıń dizimleri belgilengen.
Usı dizimge muwapıq, jámi 520 kesellik, 28 diagnostikalıq tekseriw, 46 laboratoriyalıq analiz, 235 túrdegi dári-dármaq, 27 túrdegi operativ jol menen emlew hám 76 medicinalıq xızmet túri nawqaslarǵa mámleket esabınan biypul túrde kórsetiledi.

Sáwbetlesken: Á.Jiyemuratov,
Qaraqalpaqstan xabar agentligi