Kegeyli rayonında jańa jıl bayramı múnásibeti menen «Jaslar dápteri»ne dizimge alınǵan jaslardı qollap-quwatlaw maqsetinde qayırqomlıq ilajı shólkemlestirildi.
Ilajda rayon hákimi A.Kamalov hám sektor basshıları shıǵıp sóylep, ilaj qatnasıwshıların jańa jıl bayramı menen qutlıqladı hám elimiz Prezidenti tárepinen ósip kiyatırǵan jas áwladtı hár tárepleme qollap-quwatlaw boyınsha ámelge asırılıp atırǵan jumıslardı atap ótti.
Ilajda sektor basshıları hám tiyisli uyım juwapkerleri tárepinen «Jaslar dápteri»ndegi 65 jasqa joqarı oqıw orınlarında oqıwı ushın zárúr bolǵan shártnama pulları, 58 jasqa kásip úyreniwi ushın ashılǵan arnawlı oqıw kurslarınıń tólem pulları ótkerilgen vaucherler tapsırıldı.
Sonday-aq, bayram ilajında «Mehir háreketi» qayırqomlıq ilajlarınıń dizimine kirgizilgen shańaraqlardıń perzentlerinen 200 balaǵa qısqı jıllı kiyimler sawǵa etildi. Álbette, jaslar ózlerine berilgen imkaniyat ushın keleshektegi úlken juwapkershilik sezimlerin, al, balalar bolsa sawǵaǵa berilgen jıllı kiyimler arqalı, el basshılarınıń ózlerine degen mehir-muhabbatın sezine aldı, desek aljaspaǵan bolamız.
Adilbay Orazov,
Qaraqalpaqstan xabar agentligi sholıwshısı