Qaraqalpaqstan diyqanshılıq ilimiy-izertlew institutında xalıqaralıq International Center for Biosaline Agriculture shólkemi menen birgelikte ámelge asırılıp atırǵan “Development of Sustainable Agricultural Production Systems in Degraded Areas of Karakalpakstan” xalıqaralıq joybarı sheńberinde alıp barılǵan jumıslardıń nátiyjeleri boyınsha oqıw seminarı shólkemlestirildi.
Diyqan, fermer xojalıqları hám qıytaq jer iyeleri ushın Qaraqalpaqstannıń degradaciyaǵa ushıraǵan aymaqlarında turaqlı awıl xojalıǵı óndiris sistemasın rawajlandırıw máselelerine baǵıshlanǵan bul seminarda ICBA shólkeminiń Birlesken Arab Ámirliklerindegi bas direktorı Tarifa Alzaabi hám ICBA shólkeminiń qánigesi Dr. M.Rejapova, Ózbekstan Respublikası Prezidenti janındaǵı Aralboyı xalıqaralıq orayınıń direktorı B.Habibullaev, Shımbay rayonı hákimliginiń juwapkerleri hám diyqan fermer xojalıqları, qıytaq jer iyeleri qatnastı.
Onda Qaraqalpaqstan Respublikası sharayatında degradaciyaǵa ushıraǵan jerlerdi qayta iske qosıw, aymaqlarda turaqlı awıl xojalıǵı óndiris sistemasın rawajlandırıw, suwdı únemleytuǵın texnologiyalardan paydalanǵan halda awıl xojalıǵı eginlerin jetistiriw boyınsha diyqan fermer xojalıqları hám qıytaq jer iyelerine maǵlıwmatlar berildi.
Ilaj dawamında qatnasıwshılardıń da pikir-usınısları tıńlanıp, olar qánigelerden ózlerin qızıqtırǵan sorawlarǵa juwap aldı.
Qaraqalpaqstan xabar agentligi